Trump asema Putin na Zelensky "wanataka amani"

Akizungumza na waandishi habari mjini Washington, Trump amesema kwenye mazungumzo yao zaidi ya saa nzima, Putin ameonesha dhamira ya kumaliza vita nchini Ukraine na wamejadiliana uwezekano wa usitishaji mapigano ndani ya kipindi kifupi kinachokuja.

Hayo ni mawasiliano ya kwanza ya moja kwa moja kati ya kiongozi wa Marekani na Urusi tangu Moscow ilipoivamia Ukraine mwaka 2022.

Trump baadaye alizungumza pia na Rais Zelensky ambaye ofisi yake imesema wawili hao walijadili njia za kupatikana amani na kuimarisha ushirikiano kati ya Washington na Kyiv.

Mazungumzo hayo ya Trump na viongozi wa Urusi na Ukraine yamefanyika baada ya waziri wa ulinzi wa Marekani kusema kwamba Ukraine haitoweza kurejesha eneo lote la ardhi iliyochukuliwa na Urusi na kwamba nchi hiyo inapaswa kuachana na juhudi zake za muda mrefu za kutaka kujiunga na Jumuiya ya NATO.