Trump: Me dekret më shumë krenari kombëtare në muzetë e SHBA

Presidenti amerikan, Donald Trump planifikon modifikime në programin e muzeve të famshme të Instituticionit Smithsonian. Sipas tij historia e SHBA-së duhet të paraqitet më pozitivisht, me rrjedhojën e më pak qëndrimeve autokritike dhe më shumë krenarie kombëtare. Republikani akuzon qeverinë e mëparshme nën presidentin, Joe Biden se ka shtrembëruar ideologjikisht historinë e SHBA-së dhe në këtë mënyrë e ka portretizuar atë shumë negativisht.

Zëvendëspresidenti i SHBA,  JD Vance tani do të ngarkohet me rivendosjen e "të vërtetës dhe arsyes në historinë amerikane", thuhet në dekretin e fundit të politikës kulturore nga Trump. Në të ardhmen, nuk duhet të shpenzohen më para për ekspozita që përçmojnë "vlerat e përbashkëta amerikane".

Historia e SHBA-së është prezantuar si tejet "seksiste dhe raciste"

Trump ka në shënjestër Institutin Smithsonian, një rrjet prej 21 muzesh dhe 14 institucione arsimore dhe kërkimore. Smithsonian është kompleksi muzeor më i madh në botë. Shumë nga muzetë gjenden në kryeqytetin e SHBA-së përgjatë Qendrës Kombëtare midis Monumentit të Uashingtonit dhe Kapitolit të SHBA. Hyrja në muzetë e famshëm është falas.

Sipas presidentit, historia e SHBA-së në tërësi paraqitet shumë "raciste, seksiste, shtypëse ose ndryshe me mangsësi të pakthyeshme" dhe se Institucioni Smithsonian kohët e fundit ka përhapur ideologji përçarëse, me mesazhin, se vlerat e SHBA dhe perëndimore janë të dëmshme. Si shembull konkret, dekreti përmend ekspozitën "The Shape of Power: Stories of Race and American Sculpture" në Muzeun Amerikan të Artit Smithsonian. Në ekspozitë mbahet qëndrimi, se Shtetet e Bashkuara "kanë abuzuar me konceptin e racës për të krijuar dhe mbajtur sisteme të pushtetit, privilegjeve dhe shfuqizimit të të drejtave".

Një dekret politik i këtij lloji konsiderohet i paprecedentë. Trump po përpiqet të ndryshojë rrënjësisht SHBA-në edhe në fushën e kulturës. Shtrohet pyetja, nëse  presidenti e ka në të vërtetë kompetencën për të vënë në dyshim pavarësinë e muzeve dhe institucioneve të tjera kulturore në një mënyrë të tillë. Historiani Samuel Redman, një profesor në Universitetin e Masaçusets, i tha Washington Post se ndërsa ka pasur përpjekje individuale për ndikim në të kaluarën, mbështetja financiare dhe politike për Institutin Smithsonian ka mbetur e qëndrueshme në të gjitha linjat partiake.

Institucioni Smithsonian, i themeluar në 1846, financohet rreth 62 për qind nga Kongresi Aeerikan. Fondet e tjera vijnë kryesisht nga donacionet dhe tarifat e anëtarësimit. Një zëdhënëse e Institutit Smithsonian nuk pranoi të komentonte dekretin e Trump. Debati për përpjekjet për ndikim politikën kulturore sapo ka filluar.

la/tgsch