Siri: Shumë të vdekur pas një sulmi vetëvrasës në një kishë

Sipas të dhënave të Ministrisë siriane të Shëndetësisë prej sulmit vetëvrasës në kishën e krishterë Mar-Elias në kryeqytetin e Sirisë, Damask, u vranë 20 vetë dhe  u plagosën 52 të tjerë. Ministri sirian i Informacionit, Hamsa Mostafa, e dënoi sulmin dhe e quajti atë si sulm terrorist. "Ky akt frikacak drejtohet kundër vlerave qytetare që na bashkojnë", shkroi ai në platformën X.

Dyshime për milicinë terroriste

Ky ishte sulmi i parë i këtij lloji në Siri prej disa vitesh. Deri tani përgjegjësinë për sulmin nuk e ka marrë asnjë grup, por sipas Ministrisë së Brendshme autori i përkiste milicisë terroriste të të ashtuquajturit Shtet Islamik (IS), i cili më parë kontrollonte pjesë të Sirisë dhe të Irakut.

Ministria e Brendshme tha se sulmuesi hyri në kishë, qëlloi mbi besimtarët dhe në fund aktivizoi lëndën shpërthyese. Një dëshmitar okular i tha agjencisë së lajmeve AP se burri shoqërohej nga dy persona të tjerë, por të cilët ikën kur ai iu afrua kishës.