Deklaratë qeveritare e ministrit gjerman të financave për krizën financiare

Kriza globale bankare sipas ministrit gjerman të financave Peer Shtajnbryk do të sjellë ndryshime të thella në sistemin financiar botëror dhe do të frenojë zhvillimin e ekonomisë. "Bota nuk do të bëhet më siç ka qenë para krizës", tha Shtajnbryku sot (të enjten) në një deklarate qeveritare para parlamentit. Ai foli për një tëërmet, si pasojë e të cilit SHBA-të do ta humbasin statusin e tyre si superfuqi e sistemit financiar botëror:

"Efektet e largëta të kësaj krize nuk janë momentalisht të parashikueshme, por një gjë më duket shumë e mundur. SHBA-të do ta humbasin statusin e tyre si superfuqi e sistemit financiar botëror, jo menjëherë, jo papritur, por si në erozion. Sistemi financiar botëror po bëhet multipolar."

Shtajnbryku theksoi domosdoshmërinë e një sistemi ndërkombëtar rregullash për "të civilizuar tregjet financiare". Ai lëvdoi masat e marra dhe faktin se "menaxhimi ndërkombëtar i krizave ka funksionuar. Nuk ka patur kolaps të sistemit botëror financiar".

Shtajnbryku theksoi edhe një herë kërkesën për fuzionimin e sektorit të bankave të landeve gjermane të prekur nga kriza financiare.

"Landet gjermane duhet të kapërcejnë egoizmat rajonale politike dhe të hapen për fuzionime ndërrajonale. Fuzionimi i shtatë bankave akoma të pavarura të landeve e forcon sistemin bankar gjerman. Nga federata nuk mund të presim mbështetje financiare për pastrimin e problemeve në sektorin e bankave të landeve"- tha politikani socialdemokrat në parlament.

Shtajnbryku tha se kursi i kursimeve do të vazhdohet, por në të njëjtën kohë do të merren masa për mbështetjen e konjunkturës.

Opozita e akuzoi Shtajnbrykun për mungesë autokritike dhe për dështim. Sipas liberalëve edhe shteti dhe organet e kontrollit mbajnë përgjegjësi. Të majtët folën për largim nga demokracia dhe shteti social. Të Gjelbrit përsëritën kërkesën për ngritjen e një komisioni parlamentar për të kontrolluar veprimet e gabuara financiare në bankën KfW (Kreditanstalt für Wiederaufbau).

Ministri gjerman i financave kundërshtoi kërkesat për të përgatitur në Gjermani një paketë të ngjashme me SHBA-të për shpëtimin e bankave të shkretuara. Kriza e tregut financiar është në radhë të parë një problem amerikan, tha Shtajnbryku. Ai i akuzoi SHBA-të për gabime të mëdha. Shkaku i krizës është një ekzagjerim i "papërgjegjshëm" i parimit të tregut të lirë dhe të pafrenuar. "Ky sistem jo i rregulluar sa duhet po shkatërrohet", tha Shtajnbryku.