SHBA largohen përsëri nga UNESCO

Shtetet e Bashkuara janë larguar përsëri nga UNESCO, organizata kulturore e OKB-së. Zëdhënësja e Departamentit të Shtetit të SHBA-së, Tammy Bruce, deklaroi në Uashington se anëtarësimi i mëtejshëm nuk është në interesin kombëtar. Ajo tha se UNESCO mbështet çështje përçarëse sociale dhe kulturore dhe përqendrohet tepër në Objektivat e Zhvillimit të Qëndrueshëm të Kombeve të Bashkuara. Kjo është një agjendë globaliste dhe ideologjike që bie ndesh me politikën e jashtme "Amerika e Para" të administratës amerikane.

Hyrje dhe dalje

Shtetet e Bashkuara u ribashkuan me UNESCO-n vetëm në mesin e vitit 2023, nën Presidentin e atëhershëm Joe Biden. Paraardhësi dhe pasardhësi i tij, Donald Trump, i kishte nxjerrë tashmë SHBA nga organizata gjatë mandatit të tij të parë në fund të vitit 2018, duke e akuzuar atë për mbajtjen e një qëndrimi anti-Izrael. Arsyet të tjera që u dhanë në atë kohë ishin menaxhimi i dobët dhe "qëndrimi anti-amerikan" i organizatës. Pas rizgjedhjes, Trumpi njoftoi tërheqjen nga Organizata Botërore e Shëndetësisë (OBSH) dhe pezulloi pagesat për Agjencinë e Ndihmës dhe Punës së Kombeve të Bashkuara për Refugjatët Palestinezë (UNRWA). Deri tani, SHBA kanë kontribuar rreth 8% të buxhetit të UNESCO-s. Vendimi i tërheqjes do të hyjë në fuqi në fund të vitit 2026.

UNESCO e zhgënjyer nga vendimi i SHBA-së

Drejtoresha e Përgjithshme e UNESCO-s, Audrey Azoulay, shprehu zhgënjim me tërheqjen e fundit të SHBA-së. "Ky vendim bie ndesh me parimet e multilateralizmit", deklaroi ajo. Megjithatë, organizata kulturore e OKB-së e kishte pritur tashmë këtë hap dhe ishte përgatitur për të.

Misioni i organizatës së OKB-së është të mbështesë arsimin, bashkëpunimin shkencor dhe mirëkuptimin kulturor. Ajo mbikqyr një listë të vendeve të Trashëgimisë Botërore, qëllimi i të cilave është të ruajnë monumente unike mjedisore dhe arkitekturore, duke përfshirë Koralin e Madh Barrier të Australisë, Serengetin në Tanzani dhe piramidat e Egjiptit. Kohët e fundit, në listë u shtuan kështjellat përrallore të Ludwig II në Bavari.

aud (dpa, dw)