Mynih: Makina hyn në një turmë, të paktën 20 të plagosur

Një makinë hyri në qendrën e Mynihut në mes të një grupi njerëzish. Sikurse konfirmojnë forcat e shpëtimit, ka pasur të paktën 20 të plagosur, mes tyre dy në gjendje të rëndë. Një person është reanimuar në vendngjarje, dhe me sa duket është një fëmijë. Kryetari i Bashkisë së Mynihut, Dieter Reiter, konfirmoi gjithashtu se mes të plagosurve ka edhe fëmijë. "Jam tronditur thellë," tha Reiter.

Grupi i njerëzve përbëhej nga pjesëmarrës të një proteste, të organizuar nga sindikata Verdi në landin e Bavarisë. Numri i saktë i të plagosurve ende nuk dihet, sepse një pjesë e të pranishmëve në protestë janë strehuar në ndërtesat përreth për t'u mbrojtur, tha Gerhard Peschke, zëdhënësi i zjarrfikësve të Mynihut.

Dyshim për veprim të qëllimshëm

Rrethanat e sakta të ngjarjes janë ende objekt i hetimeve. Megjithatë sipas informacioneve që ka marrë Bayerischer Rundfunk nga burime policore, policia mendon se nuk kemi të bëjmë me aksident.

Kryeministri i Bavarisë, Markus Söder (CSU), e konsideron ngjarjen në Mynih si një sulm. "Dyshohet se kemi të bëjmë me një veprim të qëllimshëm,” tha ai.

Sipas dëshmitarëve okularë ka pasur krisma

Policia njoftoi se drejtuesi i makinës është tashmë "nën kontroll" dhe për popullatën nuk ka më rrezik. "Aktualisht jemi në vendngjarje me forca të shumta," tha zëdhënësi i policisë, Schelshorn.

Një dëshmitar okular tha se makina ishte futur qëllimisht në turmën e njerëzve. Po ashtu dëshmitarët thanë se kishin parë dy burra, njëri prej të cilëve u qëllua nga policia e cila më pas e kishte marrë me vete.