Java në Gjermani me këto tema:
Kancelari Merz përballë gazetarëve
Nuk ndodh shpesh, por është pjesë e një tradite demokratike në Gjermani: Kancelari, pas marrjes së detyrës, duhet herë pas here të përballet me pyetjet e gazetarëve të akredituar në Berlin. E veçanta? Jo gazetarët shkojnë te kancelari – por ai shkon tek ata.
Të premten, më 18 korrik, Friedrich Merz mbajti konferencën e tij të parë verore me korrespondentët. Ai foli për gjithçka: ndihmën për të papunët (Bürgergeld), migracionin, Izraelin, Rusinë, politikën e borxhit të përbashkët në BE, tarifat doganore me SHBA – dhe shumë tema të tjera.
Një ditë më parë, më 17 korrik, Merz dhe kryeministri britanik Keir Starmer nënshkruan një marrëveshje historike miqësie në Londër – të parën të këtij lloji që nga Lufta e Dytë Botërore. Ajo përfshin bashkëpunim të ngushtë në fusha si mbrojtja, tregtia, teknologjia dhe politika e migracionit. "Gjermania dhe Britania përballen me të njëjtat kërcënime – dhe do të reagojnë së bashku", deklaroi Merz në konferencën e përbashkët për shtyp.
Politikë me panoramë mahnitëse
Edhe ministri i brendshëm federal, Alexander Dobrindt, priti kolegë nga vendet fqinje në një takim të veçantë – në Zugspitze, maja më e lartë e Gjermanisë. Ata ranë dakord për masa të ashpra kundër migracionit të parregullt.
Ndërkohë, në ishullin piktoresk Herrenchiemsee, në zemër të Bavarisë, u mirëprit kryeministri i Shqipërisë, Edi Rama. Ai ishte i ftuari i nderit në hapjen e festivalit muzikor dhe mbajti një fjalim për Europën. Rama u takua edhe me kryeministrin bavarez Markus Söder – një sinjal i qartë afrimi mes Ballkanit Perëndimor dhe institucioneve evropiane, përtej sallave të samiteve zyrtare.