Ja cilat janë reportazhet e kësaj jave në Europeo:
Frika nga doganat që mund të vendosë Trump për eksportet
A po vjen me Donald Trump edhe fundi i multilateralizmit në tregtinë botërore? Kjo ende nuk dihet, por shumë sipërmarrje në Gjermani dhe Europë janë të shqetësuara. Presidenti i ri amerikan ka bërë të ditur se do të vendosë dogana të larta për Europën deri në 20%. Sidomos Gjermania me nivelet e larta të eksporteve në SHBA është halë në sy për Trump.
Flixbus: Historia e suksesshme e një rrjeti transporti nëpër Europë
Historia e Flixbus filloi para 12 vitesh në Bavari. Sot linjat e autobusëve që i bien kryq e tërthor Europës janë shtuar. Aktualish rrjeti Flixbus ka si 5.600 destinacione, dhe synimi është të zgjerohet më tej. Por strategjia e suksesshme e sipërmarrjes gjermane Start-up ndeshet edhe me kritika. Kurse pasagjerët shikojnë avantazhet që kanë.
Të jetosh pranë ujit
Thuhet se ka dy ditë të lumtura në jetën e një pronari barke. Ditën kur e blen dhe atë kur e shet barkën. Por Paul dhe Antony Smith-Storey nga Britania e Madhe nuk janë penduar që shitën shtëpinë, blenë një barkë dhe e shndërruan atë në vatrën ku jetojnë. Nuk ishte varianti më i leverdishëm por jeta në ujë i bën dy britanikët të lumtur.
Ceremoni e përmortshme për kafshët e ngordhura
Mbi 34 milionë kafshë shtëpiake jetojnë në shtëpitë gjermane. Për shumë vetë ata bëhen si anëtarë familjeje- E kur një anëtar familjeje ndahet nga jeta, të gjitha duan t'i thonë lamtumirë. Në një fshat në landin gjerman të Baden-Vyrtembergut, zotëruesit e kafshëve mund të marrin pjesë madje në një meshë të përmortshme për kafshën e ngordhur. Një çift bleu një kishë dhe hapi dyert për ceremonitë e varrimit të kafshëve.