کریملن: د روسي ډېپلوماتانو د ساتني په برخه کي طالبان ستايلي
۱۴۰۰ شهریور ۱۱, پنجشنبه
د کريملن وياند ديميتري پیسکو د روسیې ختیځ ته د ولسمشر ولادیمیر پوتین سره د گډ سفر په ترڅ کي ويلي دي: »زموږ د ډېپلوماتانو له پاره د طالبانو له خوا ځيني امنيتي تضمينونه سته چي تر دې دمه عملي سوي هم دي.«
د کریملن دغه ویاند د روسیې او افغانستان ترمنځ اړیکو ته په کتو سره وویل: »باید انتظار وایستل سي چي د طالبانو لومړني ګامونه به څه وي. زموږ له پاره طبعاً په اول قدم کي دا مهمه ده چي افغانستان د ترهگرو ډلو د پټیدو مرکز و نه گرځي.«
کریملن تل ټینگار کړی وو چي غواړي د وسله والو طالبانو د احتمالي په رسمیت پیژندلو مخکي، د هغوی لومړني کارونه و ارزوي. طالبان په روسیه کي د يوه ترهگریز سازمان په توگه پيژندل کيږي او هلته يې فعاليت منع دی.
مسکو له ډیره وخته راهیسي له طالبانو سره په خبرو اترو بوخت دی. خو په افغانستان کي د هغوی بری په اندېښنې سره څاري. د دې بیره موجوده ده چي ښايي ترهگر د پخواني شوروي اتحاد سیمو ته ننوځي او په دغه سیمه کي د مخدره موادو قاچاق مخ پر ډیریدو سي.
GP/NZ/AG