کابل ته د پاکستان او ازبېکستان د باندنیو چارو وزیرانو سفر
۱۴۰۴ تیر ۲۶, پنجشنبه
د طالبانو ادارې د باندنیو چارو وزارت د پنجشنبې پر ورځ خبر ورکړ، چې د پاکستان او ازبېکستان باندنیو چارو وزیران د یوه لوړ رتبه پلاوي په مشرۍ کابل ته د دوه اړخیزو او درې اړخیزو خبرو اترو له پاره سفر کوي.
د طالبانو له لوري خپرو شویو انځورونو کې ښکاري، چې د دغې ډلې د باندنیو چارو وزیر امیرخان متقي کابل ته د ازبېکستان د بهرنیو چارو د وزیر بختیار سعیدوف هرکلی کوي.
د پاکستان د بهرنیو چارو وزارت هم منلې، چې د دغې هېواد د باندنیو چارو وزیر او په عین حال کې د لومړي وزیر مرستیال، محمد اسحق ډار د یوه ورځني سفر په موخه کابل ته سفر کوي.
د طالبانو ادارې او د پاکستان باندنیو چارو وزارت ویلي، چې په دغه سفر کې به د ازبېکستان، افغانستان او پاکستان د اورګاډي پروژې د امکان سنجونې د مطالعې تړون لاسلیک شي.
په پام کې ده، چې د اوسپنې پټلۍ دغه کرښه ازبېکستان د افغانستان له لارې له پاکستان سره وصل کړي، چې په ترڅ کې به یې د پاکستان سمندري بندرونو ته د منځنۍ اسیا هېوادونو لاسرسی ممکن شي.
د طالبانو باندنیو چارو وزارت ویلي، چې د دې تړون سربېره به د درېواړو هېوادونو تر منځ د سیاسي هوکړو او ستونزو په اړه درې اړخیزه مشورتي ناسته وشي.
د څلورو کلونو په تېرېدو سره د طالبانو حکومت یوازې روسیې په رسمیت پېژندلی. ازبېکستان او پاکستان که څه هم د طالبانو اداره یې په رسمیت نه ده پېژندلې؛ خو د دغې ډلې له حکومت سره نیږدې ډیپلوماټيکې او سوداګریزې اړیکې لري.
د طالبانو اداره چې په نړیواله کچه د نړیوال مالي سیستم څخه منزوي ده، د بهرنۍ پانګونې په لټه کې ده او په دې لړ کې د چین په ګډون ځینو هېوادونو افغانستان کې اقتصادي فعالیتونه ډېر کړي دي.