په پاکستان کې يوه بله جټ الوتکه رالوېدلې
۱۳۹۹ فروردین ۲۵, دوشنبه
د پاکستان د پوځ له خوا د نورو جزياتو د ورکړې پرته زياته شوې چې د الوتکې د سقوط له وجې پر ځمکه چا ته زيان نه دی رسیدلی. په پاکستان کې پوځ د دې ډول پېښو چې وخت پر وخت رامنځته کيږي، د پلټنو موندنې له خلکو سره نه شريکوي.
د پاکستان د پوځ د عامه اړيکو څانګې له خوا په خپره شوې اعلاميه کې راغلي: »د پاکستان د پوځ د مشاق په نوم روزنيزه الوتکه د تمرين پر مهال نن دوشنبه سهار ګجرات ښار ته نزدې رالوېدلې ده.«
په اعلاميه کې د پېښې د علت په اړه څه نه دي ویل شوي. دا په روان ميلادي کال کې پنځم وار دی چې د تمريني پروازونو په ترڅ کې الوتکې سقوط کوي.
دا تازه پېښه په داسې حال کې شوې چې همدا څو اوونۍ تر مخه د پاکستان د هوايي ځواک د يوې (ايف – ۱۶) الوتکې په سقوط کې هم يو پېلوټ وژل شوي وو. دغه الوتکه اسلام آباد ته څېرمه د عسکري پريټ له پاره د تمرين پر وخت رالوېدلې وه.
د روان میلادي کال په جنورۍ میاشت کې هم په پنجاب کې د يوې جټ الوتکې د رالوېدو په پېښه کې دوه پېلوټان ووژل شول. تر دې د مخه په جولای میاشت کې په راولپنډۍ ښار کې هغه وخت ۱۹ کسان ووژل شول چې د پوځ يوې الوتکې د استوګنې په سيمه کې سقوط وکړ. زیاتره دغه کسان په خپلو کورونو کې ووژل شول.
د پاکستان هوايي ځواک د ۲۰۱۹م کال له فيبرورۍ میاشتې راهيسې کله چې هند په پاکستان کې هوايي بريدونه ترسره کړل، د تيارسۍ په حالت کې دی. د هند حکومت هغه وخت ويلي ول چې د هغه وسله والې ډلې مرکز یې په نخښه کړی دی چې د هند تر ولکې لاندې کشمير کې یې د يوه ځانمرګي برید په ترڅ کې ۴۰ هندي عسکر ووژل.
پاکستان هم هغه وخت د دې بريدونو غچ اخیستی وو او د هند د پوځ دوې الوتکې یې وويشتلې.
bs/nz (dap)