په میلیونونو هندوان نن د هولي جشن لمانځي
۱۴۰۳ اسفند ۲۴, جمعه
هندوان د هولي رنګين جشن د ژمې د پای او د پسرلي د پيل په مناسبت او پر شر د خیر د بریا په توګه لمانځي.
د هولي جشن په ورځ په هندوستان کې عمومي رخصتي وي. دغه جشن د جنوبي اسيا په نورو هغو هېوادونو کې هم لمانځل کېږي، چې هندو رېښه لرونکي اقوام پکې ژوند کوي. د بېلګې په توګه په نيپال کې دغه جشن دوې ورځې وي چې د پنجشنبې په ورځ پيل شوی.
سږکال د هندوانو دغه جشن او د مسلمانانو روژه په یو وخت کې دي. د یو بل خبر له مخې د پاکستان په یوه علاقه کې خلک روژه او هولي په ګډه لمانځي. دغه ګډ مراسم د پاکستان د سیند ایالت په مټهي ښارګوټي کې ترسره کيږي. ۳۰ کلن هندي سوداګر راجکمار وویل: «دلته ټول دودونه او مناسک په ګډه لمانځل کيږي.» هغه د فرانسې خبري آژانس ته وویل: «تاسو به دا په هولی جشن کې ووينئ چې مسلمان ځوانان له هندو ځوانانو سره په ګډه هولي لمانځي او پر یو بل رنګونه شيندي.» راجکمار وویل: «حتی تر روژې وروسته د اختر په لمانځه کې د مسجد امام وايي چې مسلمانانو او هندوانو دواړو ته دعاوې وکړئ.»
هولي په هندو اساطيرو او افسانو کې رېښه لري چې د هندوانو خدای کرشنا او د هغه د مېرمن رادها ترمنځ د خدايي مينې او د بیا پېداېښت او د بيا ځوانېدو د وخت په معنی دی.
د هولي په ورځ په ټول هندوستان کې خلک تر ډېره سپين کالي اغوندي او پر یو بل د پوډري رنګونو په شيندلو سره دغه جشن لمانځي.
ماشومان د بامونو سر ته او بالکینونو مخې ته راوځي او له هغه ځای لاندې پر لارو تلونکو خلکو د رنګينو اوبو ډګې پوغۍ راغورځوي.
ځوانان بیا په عامه پارکونو او د سړکونو پر سر له پمپ کوونکو وسیلو استفاده کوي چې رنګينې اوبه پر یو بل ورشيندي. دغه راز په کوڅو او کورونو کې هم خلک د موسیقي په غږولو، نڅاوو او خوښيو سره هولي لمانځي.
هند په افغانستان کې د پراختيايي پروژو د عملي کولي په اړه غور کوي
په پلازمینه نوي ډيلي کې خلک په یوه پارک کې سره راغونډېږي او د یو بل پر مخونو او جامو پوډري او د اوبو رنګونه شیندي.
د کریشا بيدي په نوم یو قانون پوه چې مخ ېې په رنګونو لړل شوی وویل: «دا د ښادۍ او شوخیو وخت دی.»
اسوشتید پرېس له نوي ډيلي ليکي چې په ځينو برخو کې خلک د رنګونو شیندلو پر ځای پر یو بل ژېړګلۍ، ګلاب او سپين ګلان شيندي یا د هغو اميلونه پر غاړه کوي.
د هندوستان په شرقي ښار احمد آباد کې ګڼ شمېر خلک یوه ستر معبد ته راغلي چې په کې د ګجراتي موسیقي په غږولو، نڅاو او د رنګونو په شيندلو د هولي جشن لمانځي.
د هندوانو د دغه جشن یوه لویه برخه خواړه او څښاک تشکيلوي. په دې ورځ د دستفروشانو او دوکاندارانو بازار هم ګرم وي. د دغو دودیزو خوړو له ډلې ېو ېې «تهنډي» دی. دا فریني ته ورته خواړه دي چې له شیدو جوړيږي او پکې هیل او بادام هم ګډيږي.
په څښاکو کې بیا د بهنګ په نوم څښاک معمول دی چې له اوبو او شېدو سره څښکل کيږي. ویل کیږي چې دغه څښاک له هندوییزم او په ځانګړې توګه د هندوانو له مشر شیوا سره تړاو لري. دا د هندوانو په نورو مذهبي مراسمو او جشنونو کې هم څښکل کيږي. د بنګ څښکاک د هندوستان د قوانینو پر اساس مجاز ده او په حکومتي جواز لرونکو دوکانونو کې خرڅيږي.
د هندوستان په اکثرو برخو کې په هغه شپه چې سبا ېې هولي جشن وي، لويې اورلوبې کیږي. په دغه شپه کورنۍ اورونه بلوي چې اطرافو ته ېې د نڅاوو او بدلو وېلو تر څنګ خپلو هندو خدایانو ته دعاوې کوي.
آرشيف هندوستان سره په تړاو یو انځوریز البوم: