په غزني کې د نشه يي توکو د پروسس ۱۲ کارخانې له منځه وړل شوي
۱۳۹۸ دی ۱۱, چهارشنبه
د افغانستان د کورنيو چارو وزارت د چهار شنبې په ورځ (د ۲۰۲۰ م کال د جنورۍ ۱ نیټه) ويلي چې د مخدره موادو ضد د پوليسو ځانگړې قطعې د افغان هوايي ځواک په مرسته د عملياتو په ترڅ کې په غزني ولايت کې د نشه يي توکو د پروسس ۱۲ مرکزونه له منځه وړي. زیاته شوې چې دا عمليات د غزني د ده یک ولسوالۍ په بالي بالا سيمه کې ترسره شوي دي.
د کورنیو چارو وزارت په حواله په دې کارخانو کې ۱۳۲ ټنه چرس هم کشف او له منځه وړل شوي دي. د کورنیو چارو د وزارت له خوا زياته شوې چې د نشه يي توکو د دې کارخانو په تخريب سره د ترهگریزو ډلو په ځانگړې توگه په غزني ولایت کې د طالبانو مالي سرچينه له منځه وړل شوې ده. د کورنيو چارو وزارت د دې عملیاتو د احتمالي تلفاتو په اړه څه نه دي ويلي.
د څارونکو په آند طالبانو د خپلو وسله والو فعاليتونو د جاري ساتلو له پاره پېسو ته اړتيا لري او په دی دليل یې د مخدره موادو د توليد ځایونو کنترول په خپل لاس کې اخیستی دی.
د کورنيو چارو وزارت په تېرو کالونو کې هم د نشه يي توکو د غير قانوني او پټو فابريکو د ورانولو خبرونه ورکړي دي. افغانستان اوس هم په نړۍ کې د مخدره موادو د سترو توليدونکو څخه يو دی.
زموږ له آرشيف څخه: