په ايران کي يوه کس لس کسان په چړې وژلي دي
۱۴۰۱ مرداد ۱۷, دوشنبه
د فرانسې خبري آژانس د ایران د دولتی خبري آژانس، ایرنا، په حواله لیکي چې حمله کوونکی د لسو کسانو تر وژلو وروسته پولیسو نيولی دی.
د رفسنجان ښار سرپرست والي، حسین رضايي ياد خبري آژانس ته ويلي دي چې د دوشنبې په ورځ «یوه افغان، په رفسنجان کې لس کسان د شخصي خصومتونو له کبله وژلي دي.»
د رضايي له قوله ويل شوي دي چې دغه کس په شپه کې «هڅه کوله تر څو دغه ښار ترک کړي چې پولیسو ونيو.»
د رفسنجان والي زیاته کړه چې دغه حمله په یوه لېري پرته سيمه کې شوې چې پکې شپږ افغانان او څلور ایرانیان وژل شوي او يو بل کس ټپي دی.
د IRIB دولتۍ رسني د تورن کس په اړه ويلي دي چې هغه عصبي ستونزه لري او په مخدره موادو روږد دی.
ایران له لسیزو راهیسې د میليونونو افغان مهاجرو کوربه دی او له افغانستان سره د ۹۰۰ کیلومتره په اوږدوالي ګډه پوله لري.
تیرکال په افغانستان کې واک ته د طالبانو تر رسيدلو وروسته ایران ته د افغان مهاجرو تازه څپې پيل شوي دي.