اوربان: ډير ماشومان زيږول؛ د ژوند ښو معيارونو ته لاسرسی
۱۳۹۸ شهریور ۱۶, شنبه
د فرانسې خبري آژانس په حواله، د هنګري لومړي وزير ويکتور اوربان پر اروپايي مشرانو غږ وکړ چې د «دوديز ډوله کورنيو» مخنيوي وکړي او والدين دې د لا ډیرو ماشومانو زيږولو ته وهڅول تر څو له دې لارې مهاجرتونه رد او د اروپا د نفوس د کموالي مخه ونيول شي.
اوربان دغه څرګندونې د پنجشنبې په ورځ په بوداپست کې د چيک او سربيا هيوادونو له مشرانو سره د ېوې کتنې پر مهال کړي دي.
هغه په دغې ناسته کې نړيوالو سياستوالو، ديپلوماتانو او مذهبي شخصيتونو ته په خطاب کې وويل: « که چيرته موږ مهاجرت د يوې حل لارې په توګه ومنو، مرسته به مو کړي وي چې زموږ د نفوس ځای مهاجر ونيسي.»
اوربان همدا ډول د «چاپيريال دوسته استدلال بڼې» نظريه هم رد کړه کوم چې له مخې يې ادعا کيږي چې لږ ماشومان کولای شي د ډيرو ماشومانو په ځای پر چاپيريال باندې مثبتې اغيزې لري.
د هنګري لومړي وزير د روان کال په لومړيو کې د والدينو له خوا د ډيرو ماشومانو د زيږيدو په موخه يو تشويقي مالي پلان اعلان کړ. د دغه پلان يا سيستم له مخې هره هغه ښځه چې څلور يا له څلورو ډير ماشومان زيږوي، ټول ژوند به د مالياتو له ورکړې خلاص وي.
اوربان وويل: «موږ يوازې هغه وخت بريالي کيږو، چې د کورنيو د ملاتړ يو سيستم جوړ کړو، چې له مخې به يې هغه افراد چې د ډيرو ماشومانو لرلو تصميم نيسي، د هغو په پرتله چې دغه تصمیم نه نيسي، د لا ډيرو امتيازاتو او د ژوندانه له بهتره معيارونه څخه برخمن کيږي.»
د هنګري لومړي وزير ټينګار وکړ چې د کورنيو قانون بايد په اساسي قانون کې درج شي تر څو د حملو له خطرونو څخه محفوظ وي.
د هنګري لومړی وزير ويکتور اوربان يو عوامپاله سياستوال دی چې تيرکال يې د دريم ځل له پاره انتخابات وګټل. دی د مهاجرت سخت سیاست تعقيبوي او يو د هغو مشرانو څخه دی چې د اروپايي اتحاديې د مهاجرت د ويش له پروګرام سره مخالف دی.