«د اټومي انرژۍ اداره باید سمدستي خپل ماموريت بیرته پيل کړي»
۱۴۰۴ تیر ۵, پنجشنبه
د فرانسې ولسمشر، امانویل ماکرون، په ایران کې د اټومي انرژۍ د نړیوالې ادارې د ماموریت له سره پیل کیدل ضروري او عاجل وبلل. هغه د ایکس په شبکه کې په یوه پیغام کې ولیکل چېفرانسه له دغې ادارې په کلکه ملاتړ کوي او دغه سازمان د "اټومي امنیت له پاره حیاتی ارزښت لري."
ماکرون چې د ناټو د مشرانو په غونډه کې د گډون له پاره یې دنهاګ ته سفر کړی وو، د چهارشنبه په ورځ (۲۰۲۵ م کال د جون ۲۵ مه) د ایکس په شبکه کې په یوه بل پیغام کې ولیکل چې د اسرائیل له صدراعظم ، بنیامین نتانیاهو، سره په خبرو اترو کې یې اوسني اوربند ته د ټولو خواوو د درناوي پر اهمیت ټینگار کړی دی. هغه د خپلو خبرو په دوام وویل: «موږ گډ هدفونه لرو: هغه دا چې ایران باید هیڅکله اټومي وسلو ته لاس رسی پیدا کړي.»
اړوند:ایران غواړي پرته له وقفې خپل اټومي پروگرام ته ادامه ورکړي
د فرانسې ولسمشر په عین حال کې زیاته کړه : "د وخت په تیریدو سره د دغه ډول ډاډ د ترلاسه کولو له پاره، دا ضروري ده چې د اټومي او توغندیو د موضوعاتو په اړه خبرو اترو ته بیرته راوگرځو."
د ایران اسلامي شورا غونډې د چهارشنبې په ورځ داسي یوه طرحه تصویب کړه چې له مخې یې د اسرائیل له برید وروسته، د اټومي انرژۍ له نړیوال آژانس سره د ایران د اسلامي جمهوریت همکاري ځنډول کیږي. د اسرائیلي او امریکایي چارواکو د څرگندونو له مخې، د ایران د اټومي تاسیساتو په وړاندي د دواړو هیوادونو بریدونو، ددغه هیواد اټومي برنامې له سختو او جدي زیانونو سره مخامخې کړي دي.
د رویترز د خبري آژانس د رپوټ له مخې، امانویل ماکرون، د چارشنبې په ورځ اعلان وکړ چې فرانسه به په راتلونکو ورځو کې د ایران د اټومي تاسیساتو د زیان د کچې په اړه خپله ارزونه نهایی کړي او بیا به یې نتایج د نورو علاقه مندو هیوادونو، په شمول د امریکا متحده ایالاتو، نورو اروپایي هیوادونو او اسرائيل له ارزونو سره مقایسه کړي.
فرانسه له بریتانیې او آلمان سره په گډه، لهایران او نړیوالو قدرتونو سره د ۲۰۱۵ م کال د اټومي تړون له لاسلیک کوونکو څخه دي. پاریس د اسرائیل او ایران ترمنځ د جگړې له پیل څخه مخکې، هڅه کوله د تهران د شخړه ایز اټومي پروگرام له پاره د یوې ډیپلوماټیکې لارې په موندلو کې نقش ولوبوي.
دغو دریو یاد سوو اروپایي هیوادونو، مخکې له دې په وار وار سره له ایرانه غوښتي وه چې د اټومي فعالیتونو په کمولو سره دي، د خبرو اترو د دوام او ډیپلوماټیکي لارې د موندلو له پاره یوه مناسبه سیاسي فضا رامنځته کړي. دغو دریو هیوادونو گواښ کړی دی، که تر دوبي پورې د ایران د اټومي پروگرام په اړه د قناعت وړ موافقه ترلاسه نه سي، هغوی تیار دي چې د تهران په وړاندي محرک میکانیزم فعاله کړي.