ملگروملتونو له تاجيکستانه غوښتي چي د افغان مهاجرواخراج ودروي

له ۱۹۹۰مي لسيزي راهیسي په زرونو افغانان گاونډي هیواد تاجيکستان ته مهاجر سوي دي. هغوی په افغانستان کي د پخواني شوروي اتحاد پر وړاندي جگړې له عواقبو، په ۲۰۰۱ کال کي د متحده ایالاتو له حضور وروسته ناآرامیو او د طالبانو  د اولې او دوهمې دورې د حاکمیت د سرکوبه کولو له امله نوموړي هیواد ته پناه وړې ده.

د ملگرو ملتونو سازمان د کډوالو عالي کمیشنر (UNHCR) د فرانسې خبري آژانس ته وویل: «یو ان اچ سي آر د ۲۰۲۴م کال په ډسمبر مياشت کي افغانستان ته د ۸۰ افغان مهاجرو له اجباري بیرته ستنولو څخه خبر دی.» نوموړی زیاتوي: «زیاتره» بیرته استول سوي د معتبرو اسنادو او پناهندگۍ د کارتونو درلودونکي دي.

دغه سازمان د یوه ایمیل په استولو سره د شنبې په ورځ وویل: «د هغه کس اجباري استول چي له شکنجې یا د بشري حقونو د نورو جدي سرغړونو له مواردو سره مخامخ وي، د تاجيکستان  د مهاجرت له قوانینو سره په ټکر کي دي.»

په ایمیل کي راغلي دي چي د ۲۰۲۴م کال تر پایه پوري، څه ناڅه ۹ زره افغان پناه غوښتونکو په تاجيکستان کي ژوند کاوه.

تاجيکستان وايي چي افغان مهاجر له ډیریو هغو حقونو څخه برخمن کیږي چي د تاجیک اتباعو په برخه دي.

خو د بشري حقونو سازمانونه خبرداری ورکوي، هغه کسان چي بیرته استول کیږي، د شکنجې په گډون، آزار او ځوروني له گواښ سره مخامخ دي.

تاجیکستان  او افغانستان پیاوړي کلتوري او ژبني اړیکي لري، خو په ۲۰۲۱ م کال کي واک ته د طالبانو له رسیدو راهیسي، د دغو دواړو هیوادونو ترمنځ اړیکي ترینگلي سوي دي.

د مرکزي آسیا د نورو رهبرانو برعکس، د تاجيکستان  ولسمشر، امام علي رحمان، په تیره بیا له تاجيکانو سره چي په افغانستان کي دوهمه لویه قومي ډله ده، د طالبانو پر چلند انتقاد کړی دی.

له افغانستان  سره په سرحد کي نور هیوادونه لکه پاکستان او ایران هم له ډیره وخته راهیسي افغان مهاجر اخراجوي.