فرانسه: له زندانه په بکس کي تښتېدلی کس بیرته ونیول سو
۱۴۰۴ تیر ۲۳, دوشنبه
په فرانسه کي له زندانه د وتلو پر وخت په یوه بکس کي پټ سوی زنداني له تښتې وروسته بیرتهزندان ته واستول سو. یوه بل کس چي له هغه سره په یوه کوټه کي زنداني وو، د خپل خلاصون پر وخت نوموړی ۲۰ کلن په خپل بکس کی پټ کړی وو.
لکه څنگه چي د BFMTV په نوم رسنۍ رپوټ ورکړی دی، د لویې څارنوالۍ په حواله دغه کس د سهار له خوا د فرانسې په جنوب یوې سیمه کي له یوې زېر خانې څخه د وتلو پر وخت ونیول سو. هغه پولیسو چي د هغه د نیول کیدو له پاره ځانگړي سوي ول، نوموړی کس پیدا او بیرته ونیو.
د تیرې جمعې په ورځ د فرانسې د لیون ښار له یوه زندان څخه د هغه جالبه تښتیدل چي چارواکي ورته ۴۲ ساعته وروسته متوجه سول، د خبرونو سرټکی وگرځید او د زندان چارواکي یې له یوه ناآرامه حالت سره مخامخ کړل.
دغه ۲۰ کلن کس د خپل ملگري زنداني د کالیو په بکس کي ځان پټ کړی وو. د «لا پار یزن» په نوم ورځپاڼې رپوټ ورکړی دی چي هغه د زندان له کارکوونکو څخه د خپل دغه بکس د انتقال له پاره د یوې گاډۍ غوښتنه وکړه، تر څو خپل ډیر شخصي وسایل چي له زندانه د آزادیدو پر مهال یې باید وړي وای، تر موټر پوري انتقال کړي.
د نوموړي ورځپاڼي په حواله تښتیدلی کس د وسلو د درلودو او په وژنو کې د لاس لرلو له امله څو ځله د بند سزاگانې تیرې کړې وې. د عامې څارنوالۍ د دفتر په وینا، هغه د تنظیم سوو جرمونو په تړاو تر پلټنو لاندي وو.