طالبانو د سولې په تړاو د امریکايي جنرال خبري رد کړي
۱۳۹۷ خرداد ۱۱, جمعه
د وسله والو طالبانو ویاند ذبیح الله مجاهد د جمعې په ورځ رسنیو ته په لیږل شوې یوه اعلامیه کې ویلي دي چې د جنرال جان نیکلسن هغه څرګندونې چې په کابل کې یې له خپل دفتر څخه له رسنیو سره کړي، بې اساسه ادعاوې دي.
د تیري چهارشنبې په ورځ نیکلسن ویلي ول چې د طالبانو له لويو مشرانو سره د افغان حکومت خبري روانې دي. نوموړې همدا راز زیاته کړې وه چې نامعلوم نړیوال سازمانونه، بهرني حکومتونه او نور اړخونه هم په دې خبرو کې ښکیل دي.
مجاهد رسنیو ته په لیږل شوې دغه اعلامیه کې همدا راز ویلي دي چې په افغانستان کې د ائتلافي ځواکونو امریکايي جنرال نیکلسن له خپلو ناکامیو د خلکو د پام اړولو له پاره دغه راز بې اساسه [دروغ] څرګندونې کوي.
نوموړي همدا راز زیاته کړې ده چې د نیکلسن د دې راز څرګندونو بل دلیل په افغانستان کې د ترمپ د ادارې د نوي ستراتیژۍ د ناکامۍ د برملا کیدو پرځای غواړي په واشنګټن کې رسنۍ په دغه راز ناسمو ادعاو مصروفه وساتي.