سرچینه: یوه بله ډله افغانان هم آلمان ته انتقالیږي
۱۴۰۴ فروردین ۶, چهارشنبه
په غیردولتي سازمانونو کي سرچینو د فرانسې خبري آژانس ته ویلي دي چي په پام کي ده له خطر سره مخامخ افغانانو یوه بله ډله چي آلمان ته د تګ اجازه ورکړل سوې ده، له خپلو کورنیو سره آلمان ته انتقال سي.
سرچینو ویلي دي چي له افغانانو ډکه دغه الوتکه به د چهارشنبې په ورځ ناوخته له اسلام آباد څخه پرواز وکړي او د پنجشنبې په ورځ به د هانوور په هوايي ډگر کي ناسته وکړي.
په دغه پرواز کي هغه کسان انتقالیږي چي مخکې یې د آلمان د حکومت له خوا د منلو ژمنه ترلاسه کړې ده، خو د هغوی شمیر لا معلوم نه دی.
اړوند:اوس هم ۲۸۰۰ افغانان آلمان ته د داخلیدو په تمه دي
د آلمان د کورنیو چارو وزارت د دغه پرواز په هکله رپوټونه، نه رد او نه هم تائيد کړي دي.
د آلمان د حکومت معلومات ښيي چي له سخت گواښ سره مخامخ شاوخوا ۲۸۰۰ افغانان چي د جرمني د منلو ژمنې يې ترلاسه کړي دي او دغه هیواد ته د انتقال په تمه دي، باید اسلام آباد ته ولاړ سي، ویزه تر لاسه او امنیتي ارزونې ترسره کړي.
په تیرو اونیو کي هم دآلمان د منلو د ژمنو درلودونکي افغانان، په چارتر پروازونو کي له اسلام آباد څخه آلمان ته انتقال سوي دي.
د مسيحي دیموکرات او مسيحي سوسیال محافظه پاله فراکسیون چي د آلمان په انتخاباتو کي بریالی سو او غواړي له سوسیال دیموکراټ گوند سره ائتلافي حکومت جوړ کړي، د بهرنیو چارو له وزارت څخه غوښتي دي چي د نوي حکومت تر جوړیدو پورې دي د افغانانو انتقال په ټپه ودروي.
اړوند:د نوي حکومت تر جوړښت پوري آلمان ته د افغانانو د انتقال د ځنډولو غوښتنه
د دغو گوندونو د پارلماني فراکسیون مرستیالي اندریا لیندهولڅ، د مارچ مياشتي په لومړیو کي د فرانسې خبري آژانس ته ویلي وه چي آلمان ته د افغانانو د انتقال په اړه باید د جرمني نوی حکومت پریکړه وکړي.
دغه دواړه گوندونه له سوسیال ډیموکراټ گوند سره یوې هوکړې ته رسیدلي دي چي له مخې یې باید له گواښ سره مخامخ افغانانو د منلو د پروگرام په گډون د منلو ټولې برنامې په ټپه ودرول سي.
تیره ورځ نیژدې ۵۰ سازمانونو د آلمان له نوي حکومت څخه وغوښتل چي د منلو دغه پروگرام ته ادامه ورکړي.