روسیې د بخښنې نړيواله ټولنه د«نامطلوب سازمان» په توګه نومولې
۱۴۰۴ اردیبهشت ۲۹, دوشنبه
د روسیې د لویې څارنوالۍ دفتر د دوشنبې په ورځ (۲۰۲۵ م کال د می ۱۹مه) په یوه بیان کې وویل چې په لندن کې د بخښنې نړیوال سازمان مرکزي دفتر " له روسیې څخه د بیرولو نړیوالو پروژو د چمتو کولو مرکز دی چې د کیف د حکومت د ملګرو له خوا تمویل کیږي." همدا راز زياته سوې چې په سملاسي توګه سر له اوسه په روسیه کې د بشري حقونو د دې سازمان ټول فعالیتونه منع دي.
سربیره پردې د روسیې د لویې څارنوالۍ دفتر د بخښنې نړیوال سازمان یا امنستي انترنشنل په دې هم تورن کړی چې "په سیمه کې یې د پوځي شخړو د زیاتولو، د اوکراین د نوي نازیانو د جرمونو د توجیه کولو، د هغوی د زیات تمویل له پاره د غوښتنو او زموږ د هیواد له سیاسي او اقتصادي انزوا څخه د ملاتړ کولو له پاره یې "هر څه ترسره کړي دي".
هغه سازمانونه چې په روسیه کې د «ناغوښتل سوو» سازمانونو په توگه طبقه سي، په دغه هیواد کې نور فعاليت نه سي کولی. هرهغه څوک چې د دغو سازمانونو سره د "همکارۍ" په تور تورن سي، د جریمې یا د اوږدې مودې د بند له سزا سره مخامخ کیږي.
مسکو په ۲۰۲۲ م کال کې لا په روسیې کې د بخښنې د نړیوال سازمان دفترونه تړلي وو. په مسکو کې د عدلیې وزارت په هغه وخت کې دا استدلال وکړ چې دوی "د روسیې له قانون څخه د سرغړونې" له امله په روسیه کې د بهرنیو غیر دولتي سازمانونو له رسمي ثبت یا راجستر څخه ایستل سوي دي.