دوریان توپان: د بهاماس ۷۰۰۰۰ کسان عاجلو مرستو ته اړتیا لري

د دوریان، توپان له کبله د بهاماس په ټاپوګانو کې د مړو شوو کسانو شمیر۲۰ تنو ته لوړ شوی دی او تر خرابیو لاندې د کسانو د لټون چارې پیل شوي دي.

د بهاماس د روغتیا وزیر دوانه سندز، له یوه ځایي راډیو سره په خبرو کې د توپان له کبله د شلو کسانو مړینه تائید کړې ده. تر اوسه یوازې د ۷ کسانو د مړینې خبره کیده. ډیرو رسنیو د روغتیا د چارو وزیر له قوله لیکلي دي چې ښایي د مړو شوو کسانو شمیر لوړ شي.

ملګرو ملتونو ویلي دي چې شا او خوا ۷۰۰۰۰ زره انسانان لومړینو ضروري مرستو ته اړتیا لري. زیاته شوې ده چې په لومړي سر کې تر ټولو زیات خوراکي توکو، اوبو، سرپناوو او دارو درملو ته اړتیا ده.

ملګرو ملتونو قربانیانو ته د مرستو رسولو له پاره د بیړنیو مرستو له صندوق څخه یو میلیون ډالر مرسته کړې ده.

د ژغورنې چارې لا پسې ګړندۍ شوي دي چې په ترڅ کې یې د امریکا متحده ایالاتو ساحلي ګارد او سمندري ځواک څرخي الوتکې د روغتیایي چارو په برخه کې مرستې کوي او رامنځ ته شوی زیان ارزوي.

په ګریند بهاماس کې ځینې خلک په دې هڅه کې دي چي هغه خلک د کښتیو په واسطه انتقال کړي چې کورونو یې سیلاب لاندې کړي دي. د فري پورت، هوایي ډګر توپان سخت ځپلی دی او ځغاستلیکه یې د الوتنو له پاره د استفادې وړ نه ده، چې په دې سره د مرستو رسولو لړۍ له ستونزو سره مخامخ ده.

د دوریان، توپان بهاماس ته تر رسیدو وروسته سختۍ ویجاړۍ رامنځ ته کړې دي. د دغه توپان د باد سرعت په یوه ساعت کې ۳۰۰ کیلومترو ته رسید. دغه توپان یوه بشپړه ورځ بهاماس چې له ټاپوګانو جوړ دی وځپه. سخت باد چې له باران سره مل وو ځینې ودانۍ ونړولې او د سختو سیلابونو سبب شو.

دغه توپان چې اوس لږ کمزوری شوی دی د متحده ایالاتو د سویل ختیځ ساحل پر لور د حرکت په حال کې دی او د متحده ایالاتو د جورجیا او شمالي کارولینا ایالاتونو کې خبرداری ورکړل شوی دی.

د سویلي کارولینا په ساحلي سیمه کې شا او خوا ۸۳۰۰۰۰ کسانو ته د سیمې د تخلیه کولو امر شوی دی.

rs/sms sr/nz (AP, AFP, dpa, Reuters)