د پاکستان ولسمشرد کوچنیانود ودونو د منع کولو قانون لاسلیک کړ
۱۴۰۴ خرداد ۹, جمعه
پاکستان په نړۍ کي یو له هغو هیوادونو څخه دی چي د کوچنیانو د ودونو لوړه کچه لري. په دغه هیواد کي په میلیونونو نجونې، قانوني عمر ته له رسیدو مخکې ودونه کوي.
اوس د دغه هیواد د پایتخت اسلام آباد په سیمه کي یو نوی قانون نافذ سوی دی، تر څو له اتلسو کلونو کم کوچنیانو پر ودونو باندي بندیز ولگول سي.
د پاکستان ولسمشر آصف علی زرداري، د جمعې په ورځ (۲۰۲۵ م کال د می ۳۰) د کوچنیانو د ودونو د منع کولو قانون لاسلیک کړ. مخکې له دې څو بانفوذو اسلامپالو ډلو پر دغې طرحې باندي انتقادونه کړی ول.
اړوند:له ښوونځیو او پوهنتونونو څخه د محرومو نجونو اجباري ودونه
نوی قانون په لومړي سر کي یوازي د دغه هیواد په پلازمینه اسلام آباد کي پلی کیږي. د نوموړي قانون له مخې، مسلمان روحانیون یوازي هغه وخت دنکاح د تړلو اجازه لري، چي نجلۍ او هلک لږترلږه اتلس کلن وي.
د بشري حقونو فعالین تمه لري چي دغه قانون په ټول هیواد کي عملي سي.
پاکستان د یوه مرکزي حکومت په لرلو سره یو فدرالي نظام دی او سربیره پردې ایالتونه هم خپل حکومت او پارلمان لري.
د ملگرو ملتونو سازمان د کوچنیانو د ملاتړ ادارې د رپوټ له مخې، په پاکستان کي ۲۹ سلنه نجوني اتلس کلنۍ ته له رسیدو مخکې ودونه کوي.
له همدې کبله د آسیا په جنوب کي پس له هند او بنگله دیش څخه، پاکستان تر ټولو ډیر کوچنۍ ناویاني لري.
اړوند:ولي په زرونو نجوني جبري ودونو ته مجبوريږي؟
د نوموړي رپوټ په حواله، په دغه هیواد کي د اغیزمن سوو نجونو حداقل یو پر دریمه برخه اتلس کلنۍ ته له رسیدو مخکې مینداورې کیږي او ډېري یې مکتب ته د تلو چانس له لاسه ورکوي.