د پابجي ګیم؛ ولې پاکستاني ځوان د خپلې کورنۍ څلور غړي وژلي؟
۱۴۰۰ بهمن ۱۱, دوشنبه
پولیسو د دغه هلک نوم، علي زین ښودلی دی چې د جنوري میاشتې په ۱۸مه يې خپله مور، دوه خويندې او یو ورور په ډزو وژلي دي. هغه د اوونۍ په پای کې وويل چې هغه د پابجي ګيم د دغه عمل ترسره کولو ته تحریک کړی دی.
د پولیسو یو پلټونکي، عمران کشور په لاهور کې خبريالانو ته وويل چې «دا په خپل ډول کې لومړنۍ پيښه نه ده هغه او زیاته یې کړه: «له همدې کبله موږ پریکړه وکړه چې د [پابجي ګیم] بندیز وړاندیز وکړو.« کشور زیاته کړه چې ۱۸ کلن علي تل په خپله کوټه کې اوسیده او په ګيم وهلو روږدی شوی وو.
د ډان په نامه انګلیسي ژبې ورځپاڼې د لاهور د پولیسو د یوه افسر له قوله ليکلي دي چې علي «د خپلې کورنۍ پر غړو په دې فکر ډزې کړي چې هغوی به هم د ګیم په څير بیرته را ژوندي کیږي.«
پاکستاني چارواکو تر اوسه پورې څو ځله د تاوتريخوالو د پیښو په نتيجه کې د راپورته شوو شکایتونه له کبله په یاد ګیم موقتي
بندیز لګولی دی. پابجي د پر فروشه فلمونو او کتابونو په څير د نړۍ پر یو مشهور ګيم باندې بدل شوی دی.
دغه ګيم چین او هندوستان په ګډون په ډيرو نورو هیوادونو کې هم په موقتي او یا د لنډې مودې له پاره بند شوی دی.
آ/م.ک.ص./ا.ا.