د تِسلا موټر جوړولو شرکت په اروپا کي څه غواړي؟

په جرمني کي د په زرهاوو تِسلا برقي موټرو تولید کیدلای سي ددغه هیواد د موټر جوړولو شرکتونو ته سخته ضربه ورکړي، هغه هېواد ته چي اصلي صنعت یې د موټرونو تولید تشکیلوي او په ټوله اروپا کي لومړی مقام لري. که څه هم فولکس واگن، مرسډیس بنز، پورشه او بي ايم ډبليو د برقي موټرونو د تولید له پاره ډیر پلانونه لري، خو بازارونو ته یې د تِسلا ورداخلیدل کیدلای سي دوی مجبور کړی،چي پر خپلو پخوانیو پلانونو باندي غور وکړي او ډیر برقي موټران تولید کړي.

لکه څنگه چي آلمانۍ «بیلډ» ورځپاڼي خبر ورکړی دی، تِسلا به د برلین په شاوخوا کي د کاله ۵۰۰۰۰۰ برقي موټرونه تولید کړي. د هغه ابتدايي سرمایه څلور ملیارډه یورو اټکل سوې او د تولید ساحه به یې د فوټبال د څلورو میدانونو په اندازه وي. په هغه کي به لسو زرو کسانو ته کارونه پیدا سي.

باید وویل سي، چي د تسلا شرکت داسي برقي موټرونه هم تولیدوي، چي سرعت یې تر سپورټي موټرونو هم ډیر وي او د ۲،۹ ثانیو په لنډه موده کي په ساعت کی خپل سرعت سلو کیلومترو ته پورته کولای سي.