د تهران والي: غیر قانوني اتباع به له پیژندلو وروسته اخراج سي
۱۴۰۳ اسفند ۱۵, چهارشنبه
د تهران والي محمد صادق معتمدیان، له ایسنا خبري آژانس سره په خبرو کي ويلي دي چي د ولایتونو په کچه د غیرقانوني اتباعو د پیژندلو طرحه رامنځته سوې ده او پیژندل سوي کسان به کمپونو ته انتقال او د رسمي سرحدونو له لاري خپلو هیوادونو ته واستول سي.
هغه همدارنگه له غیرقانوني اتباعو څخه وغوښتل چي په خپله خوښه دي د خاوران کمپ ته مراجعه وکړي او ځانونه معرفي کړي.
اړوند:مرستندویه سازمان: ایران هره ورځ ۳۰۰۰ افغانان اخراجوي
د تهران والي له هغو ډلو سره د چلند په اړه چې له غیر قانوني اتباعو څخه گټه اخلي وویل: «د قانون له مخې موږ د هغو ډلو او مرکزونو له پاره چې له غیر قانوني اتباعو څخه استفاده کوي د مخکي له مخکي مخنیوي تدابیر نیولي دي. دغه مرکزونه د قانون له مخې مهر و لاک سول.» هغه زیاتوي چي د روان کال له پیل راهیسي شاوخوا ۲۵۰ زره غیرقانوني اتباع په تهران کي نیول سوي دي.
دغه اقدامات د مهاجرو په تیره بیا د افغانانو د شمیر د کموالي په اړه د ایران له نوو پالیسوو سره سم ترسره کیږي. د ایران امنیه قوماندان احمد رضا رادان، په دا وروستیو کي اعلان وکړ چي دغه هیواد په پام کي لري چي د ۲۰۲۵م کال د مارچ مياشتي تر پایه، لږ تر لږه ۲ میلیونه غیرقانوني بهرني اتباع اخراج کړي.
سربیره پردې، دتهران ښاروالۍ هم مخکي له دې د مهاجرو له پاره ډېري معاملې (دوکاندارۍ) منع کړي وې.
دغه ډول اقدامات په داسي حال کي کیږي چي د ایران پارلمان "د بهرنیو اتباعو د ورتګ او اقامې په اړه د قانون د اصلاح " تر عنوان لاندي یوه طرحه تر ارزوني لاندي لري چي د هغې د تصویب په صورت کی به د مهاجرو له پاره لا ډیر محدودیتونه وضع سي. په دغه طرحه کي په کال کي د مهاجرو لس سلنه کمیدل او د هغوی د اوسیدو او کارونو په برخه کي سخت محدودیتونه شاملیږي.
د بشري حقونو سازمانونو د نوموړو اقداماتو په هکله خپله اندېښنه ښودلې ده. په رپوټونو کي راغلي دي چي تیر کال څه د پاسه ۱،۳ میلیونه افغانان له ایران څخه اخراج سوي دي چي تر ۲۰ زرو یې زیات کوچنیان وه. دغه ډول حالت په ایران کي د بشري حقونو د وضعیت او دمهاجرو د ژوند د شرایطو په هکله سختي اندیښنې رامنځته کړي دي.