د بشري حقونو اروپايي محکمه د کندوز پيښه ارزوي
۱۳۹۸ شهریور ۷, پنجشنبه
د بشري حقونو اروپایي محکمې یوه ویاند د فرانسې خبري آژانس ته ویلي دي چې عالي محکمه به د آلمان پر ضد د یوه افغان اقامه دعوا و ارزوي. د هغه په خبره د دې قضیې په تړاو به علنې محاکمه د راتلونکي میلادي کال په لومړۍ ربع کې پیل شي.
د بشري حقونو د اروپایي محکمې د ویاند په خبره د بشري حقونو اروپایي محکمې ته د وړاندې کړل شوي ۶۰۰۰۰ دوسیو څخه هرکال ۳۰ یې عالي محکمې ته د رسیدګۍ له پاره وړاندې کیږي. خو د عالي محکمې د پریکړې پر وړاندې تجدید نظر نه شي کیدای.
دغه دعوا د عبدالحنان په نوم يوه افغان کړې ده، چې د ۲۰۰۹م کال د سپتمبر میاشتې پر څلورمه نیټه په تر سره شوي دغه برید کې یې دوه زامن وژل شوي دي چې عمرونه یې اته او ۱۲ کاله وو.
عبدالحنان او همداشان د دغې پيښې د نورو قربانیانو د کورنیو له خوا د آلمان په يوه محکمه کې د خونبها یوه دعوا ناکامه شوې وه.
په لومړي سر کې د دغه هوایي برید د بې اغیزې کولو هڅې د آلمان د حکومت له پاره په یوه کړکیچ واوښتې. د هغه مهال د دفاع وزیر فرانڅ یوزف یونګ، دغه هوایي برید توجیه کړی وو. د ۲۰۰۹م کال په نومبر میاشت کې د برید په اړه د مهمو معلوماتو د نه ښکاره کولو په تور هغه د کار د چارو وزیر له خپلې نوې دندې استعفا ورکړه.
د دغه تر سره شوي برید امر هغه وخت په کندز کې د آلمان د پوځ پخواني قوماندان ډګروال ګیورګ کلاین ورکړی وو. د دې شالید د طالبانو له خوا په کندز کې د آلمان پوځې اډې ته څیرمه د تیلو د دوو ټانکرونو تښتولو ته ورګرځي.
ډګروال کلاین اندیښنه درلوده چې له دغو ټانکرونو څخه به د دوی پر ضد د متحرکه بمونو په توګه استفاده وشي. د آلمان د پوځ د غوښتنې له مخې امریکایي جېټ الوتکو پر دغو ټانکرونو برید وکړ.
د بیلا بیلو معلوماتو له مخې په دغه هوایي برید کې له ۱۴ څخه تر ۱۴۲ پورې کسان ووژل شول چې پکښې له ۱۴ څخه تر ۱۱۳ تنه ملکي وګړي ول.
د آلمان اردو د وژل شوو کسانو شمیر ۹۱ تنه ښودلی او د ټپیانو شمیر بیا ۱۱ تنه. د بشري حقونو اروپایي محکمې ټینګار کړی دی چې د هوایي برید په پایله کې د قربانیانو دقیق شمیر معلوم نه دی.