د بخښني نړيوال سازمان: له آلمانه يو افغان بايد اخراج نه سي
۱۴۰۴ تیر ۱۹, پنجشنبه
د بخښني نړيوال سازمان د چهارشنبې په ورځ (۲۰۲۵م کال د جولای ۹) په برلين کي وويل چي د پر دې سربيره چي آلمان دي له خطر سره مخامخ افغانان آلمان ته را انتقال کړي، يو افغان دي هم افغانستان ته نه اخراجيږي.
د سې شنبې په ورځ د جرمونو نړيوالي محکمې په افغانستان کي د ښځو او جنسي لږکيو د ځپلو په تور د طالبانو د مشر ملا هيبت الله او د قاضي القضات عبدالحکيم حقاني، د نيولو حکم صادر کړ.
په آلمان کي د بخښني نړيوال سازمان د آسيا د څانګي کارپوهي تيريسا برګمن په برلين کي وويل: «افغانستان ته هر ډول اخراج اوس په ښکاره توګه د نړيوالو قوانينو خلاف کار دی.»
هغې زياته کړه چي پر دې سربيره بايد د آلمان حکومت خپلي هغه ژمني پوره کړي چي د منلو پروګرام په چوکاټ کي يې کړي دي او هغه کسان آلمان ته راانتقال کړي چي په آلمان کي يې د منلو ژمني ترلاسه کړي دي.
کوم کسان له آلمانه اخراجيږي؟
د آلمان د مهاجرت فدرالي ادارې ارقام ښيي چي په دغه هېواد کي د میشتو هغو افغانانو شمېر چي باید له دغه هيواده ووځي، شاوخوا ۱۱نیم زرو ته رسیږي. آلمان هڅه کوي په لومړي ګام کي مجرم مهاجر اخراج کړي.
په روانه اونۍ کي د برلين يوې اداري محکمې په يوه چټکه پروسه کي پريکړه وکړه چي دغه هيواد باید هغي افغاني کورنۍ ته ويزه ورکړه چي په ۲۰۲۳م کال کي يې په آلمان کي د افغانانو د منلو پروګرام په چوکاټ کي يې د منلو ژمنه ترلاسه کړې وه.
د آلمان د بهرنيو چارو وزارت د معلوماتو له مخي اوس هم تر ۲۴۰۰ زيات افغانان چي په آلمان کي د منلو ژمنه ورسره سوې ده، په پاکستان کي شپې او ورځي سبا کوي.