د امریکا په هوایي ډګر کې د مسافر له بکسه راکټ لانچر راوتی

دغه «راکټ لانچر» د دوشنبې په ورځ سهار وختي د «بالتیمور، واشنګټن هوایي ډګر» د ترانسپورت د امنیت ادارې مامورینو موندلی دی. دغه خبره د دې ادارې ویاندې لیزا فاربستاین په تویتر ټولنیزې رسنې، کې کړې ده.

د لیزا په خبره د بکس مالک امنیتي مامورینو ته ویلي دي چې دغه راکټ لانچر یې په کویټ کې د ډالۍ په توګه ترلاسه کړی وو نو ځکه یې له ځان سره امریکا متحده ایالاتو ته راوړ.

د ترانسپورت د امنیت ادارې په یوې بیانیه کې ویلي دي چې د بکس مالک د تکزاس ایالت اوسیدونکی دی او مامورینو ته یې ویلي دي چې همدا اوس هم د امریکا متحده ایالاتو په پوځ کې خدمت کوي.

په بیانیه کې راغلي دي: «له نیکه مرغه دا یو فعاله وسله نه وه. خو سربيره پر هغه دغه وسله ضبط شوې ده او چارواکو ته په امن توګه د له منځه وړلو په موخه وسپارل شوه. هغه کس [د بکس مالک] ته اجازه ورکړل شوه چې په الوتکه کې سپور شي.»

له بیانیه سره د دې راکټ لانچر انځورونه هم خپاره شوي دي. د ترانسپورت د امنیت ادارې ویلي دي چې مسافر نه شي کولی پوځي وسلې په خپلو بکسونو کې ځای پر ځای کړي.

(ms/nz (afp