د بودیجې کمښت؛ دامریکا د۲۷ سفارتو او قونسلگریو د تړلو احتمال
۱۴۰۴ فروردین ۲۷, چهارشنبه
د څوامریکايي رسنیو په حواله، د نوموړې طرحې په عملي کولو سره ښايي د دې امکان هم رامنځته سي چي په نړیوالو سازمانونو، لکه ملگرو ملتونو او ناټو پورې تړلې تقریباً ټولې بودیجې حذف سي.
د نیویارک ټایمز ورځپاڼي د رپوټ له مخې، د امریکا متحده ایالاتو د بهرنیو چارو وزارت په ۲۰۲۶م کال کي د ۲۸،۴ میلیارډه ډالرو معادل بودیجه په پام کي لري چي دغه اندازه به د ۲۰۲۵م کال له بودیجې څخه ۲۶ میلیارډه ډالر کمه وي.
اټکل سوی دی چي امکان لري د جرمني په دوسلدورف او لایپڅیگ کي د امریکا قونسلگرۍ د سپما د دغه اقدام قرباني سي.
همدارنگه په بیلابیلو هیوادونو لکه فرانسه ، ایټالیا، سکاټلنډ، لوکزامبورگ، مالتا، اریتیریا او جنوبي سوډان کي هم پنځه قونسلگرۍ ښايي د تړل کیدو په نوملړ کي شاملې وي.
د دې بیره موجوده ده چي، دغه طرحه به د "سولې د ساتلو او تعلیمي نوښتونو" پر نړیوالو ماموریتونو باندي هم اغیز ولري. خو تر اوسه پورې د امریکا متحده ایالاتو د بهرنیو چارو وزارت له خوا په دې اړه هیڅ ډول رسمي دریځ نه دی نیول سوی.