د امريکا لويديځه برخه لا هم د اور په لمبو کې سوځي

د امریکا په درو ايالتونو کې د اور وژنې په لسګونو زره کارکونکي، له لګيدلو اورونو سره په مبارزه بوخت دي.

یوازې د اورېګون ايالت د ۳۶۰۰ کیلومتره مربع ساحه کې چې نژدې د هسپانيا د مایورکا ټاپو په مساحت ځای دی، د اور په لمبو کې سوځي.

د اورېګون ايالت مشرې (والي) کتي براون ويلي دي چې د اورلګيدنې له امله تر اوسه ۴۰ زره کسان د خپلو کورونو پريښودو ته اړ شوي دي.

تر اوسه لږ تر لږه ۲۶ کسانو په اورلګيدونو کې خپل ژوند له لاسه ورکړی دی. د سيمې ډير اوسیدونکي لادرکه دي. وړاندوينه شوې چې د تلفاتو کچه به ښايي لا لوړه شي.

د اورېګون ايالت په ځينو سيمو کې اور مړ شوی، خو لا هم سرې دي او د دې امکان نشته چې د پاتې يا لادرکه کسانو لټون په کې وشي.

اورلګیدنه د اورېګون ایالت پنځو ښارونو ته رسيدلې. له ۵۰۰۰ کسانو څخه غوښتل شوي چې د سیمې تخلیه کولو ته تیاری ونیسي.

د کلفورنیا تر ټولو لوی ښار، لاس انجلس هم له اوره په امان نه دی. په انځور کې د اور وژنې يوه الوتکه د دغه ښار په شمال ختيځ کې د اوروژنې د ماموريت پر مهال.

د اور لمن د کلیفورنيا په سويل کې هم خپره شوې. په دغې سيمه کې له ۱۰ زره کيلومتره مربع ځمکې څخه ډيره د اور په لمبو کې سوځي.

د کلفورنیا ايالت والي، ګاوين نيوسام، د سیمې اوسیدونکو او د اوروژنې لسونو زره کارکونکو ته ډاډ ورکوي چې په هوا کې د بدلون راتلل به «مرسته» وکړي چې اور تر کنټرول راوستل شي.

د کاليفورنيا ايالت د والي په خبره، که تر اوسه تندو بادونو د اور په خپريدو کې مرسته کړې په راتلونکو ورځو کې به ورښتونه، د هوا سړيدل او د باد شدت کمیدل به د اوروژونې په برخه کې مرسته وکړي.

د امريکايي په لويديځو ساحلونو په روانو اورلګيدونو کې تر اوسه لږ تر لږه ۲۶ کسان مړه شوي دي. وړاندوينې کيږي چې د تلفاتو کچه به لوړه شي.

د پنجشنبې په ورځ (د سپتمبر ۱۰مه) د اور لمن د کلفورنیا ښار مختلفو سيمو ته ورسیده. د اور قوت د وښو او خځلو په سوځيدو سره يې دومره ډیر شو چې تر دې مخکې يې په دغه ایالت کې ساری نه وو.

کارپوهان وايي اقليمي بدلونونه، وچ چاپيريال او د حرارت درجې لوړيدا، په خپله په ځنګلونو کې د اورلګيدنې شرايط اماده کوي.

له ۱۹۳۰م کال راپدیخوا چې په کلفورنيا ایالت کې د اورلګیدنې ۲۰ لويې پيښې ثبت شوي، په هغو کې ۶ يې له همدغو پيښو څخه دي چې همدا اوس ادامه لري.

د کلفورنیا د تر ټولو لوی ځنګله له سوځيدو څخه دوه کاله تيريږي. دغه اورلګيدنه د ۲۰۱۸م کال په نوامبر کې شوې وه چې څه باندې ۸۰ کسان په کې مړه شول.