د اسرائیل د دفاع وزیر د غزې د نیولو له طرحې سره موافقه وکړه
۱۴۰۴ مرداد ۲۹, چهارشنبه
د اسرائیل د دفاع وزیر، یسرائیل کاتڅ د غزې د ښار د نیولو له پاره د پوځ له عملیاتي طرحې سره موافقه کړې ده. د "ټایمز اسرائیل" ورځپاڼې لیکلي چې ددغې طرحې د پلي کولو له پاره به نور شاوخوا ۶۰ زره ریرزف یا منتظر سوي ځواکونه راوبلل سي.
د آلمان حکومت نوموړي خبر ته په غبرگون کې اعلان کړی چې په غزه کې د اسرائیلو له نظامي کمپاین سره مخالف دی. د المان د حکومت ویاند، شتیفن مایر، خبریالانو ته وویل : «د دغې موضوع درک د آلمانانو له پاره ډیر ستونزمن دی چې دغه ډول اقدامات څه ډول کولای سي د ټولو یرغمل سوو د آزادیدو او یا هم یوه اوربند ته د رسیدو سبب سي.»
اړوند:په لسونو زره خلکو په تل ابیب کې د غزې جګړې د پراخولو پلان پر ضد لاریون وکړ
د نوموړې طرحې د عملي کولو تأیید په داسي وخت کې رامنځته کیږي چې د حماس ډلې د نړیوالو په منځگړیتوب د غزې په تراډه کې د اوربند له پاره یوه نوي وړاندیز ته "مثبت" ځواب ویلی دی.
تمه کیږي چې د اسرائیلو رسمي غبرگون به د اونۍ تر پایه اعلان سي. د رسنیو د رپوټونو له مخې، په پام کې ده چې د اسرائیلو امنیتي کابینه به د پنجشنبې په ورځ په دې تړاو یوه غونډه جوړه کړي.
اسرائیل د یرغمل سوو د آزادیدو غوښتنه کوي
اسرائیلي رسنیو د یوه لوړ پوړي حکومتي چارواکي له خولې رپوټ ورکړی چې د اسرائیلو سیاست "ثابت" پاته دی او تغییر یې نه دی کړی. د دغه رپوټ په حواله، اسرائیل د ټولو ۵۰ تنو یرغمل سوو اسرائیلي وګړو د آزادۍ چې" له هغه اصول سره مطابقت کوي چې کابینې د جگړې د پای ته رسیدو له پاره ټاکلی دی" غوښتنه کوي. همدارنگه دا هم راغلي: «موږ د حماس په هکله د پریکړې په وروستي پړاو کې یواو حتی یو یرغمل به هم پاته نه سي.»
د جگړې د پای ته رسیدو له پاره د اسرائیلو په شرایطو کې، د حماس ترهکرې ډلې بې وسلې کیدل، د ټولو یرغملو بیرته ستنول، د غزې د تراډې غیرنظامي کول، د اسرائیلو امنیتي کنټرول او د یوې بدیلې ملکي ادارې جوړول چې نه د حماس او نه هم د فلسطیني ادارې له خوا کنټرول سي.
اړوند:د غزې د نیولو له پاره د اسرائیلو د پوځ نوی پلان
په دغه طرحه کې د شاوخوا یو میلیون نفوس په لرلو سره د غزې د ښار تخلیه کیدل شاملیږي. د اسرایلي خبري رسنۍ "واینت" رپوټ ورکړی چې کاتڅ دا موافقه هم کړې چې د هغو ملکي کسانو د بیا میشتیدنې له پاره چمتووالی ونیسي چې له ښار څخه ایستل سوي دي او د غزې په تراډه کې جنوب پلو ته یو ځای ته لیږدول کیږي. په پام کې ده چې هلته به د هغوی بشري اړتیاوې تضمین سي.
د غزې د نیولو د خطرونو په هکله خبرداری
د اسرائیلو د پوځ لوی درستیز، ایال زمیر، د سرتیرو او پاتو یرغمل سویو له پاره د نوموړي پلان له جدي خطرونو څخه خبرداری ورکړ، خو بالاخره یې د امرونو د عملي کولو له پاره پلانونه جوړ کړي دي.
داسي اندیښنې موجودې دي چې یرغلیز بریدونه به د غزې د تراډې د ملکي کسانو، له ناورینه ډک حالت لاپسې خراب کړي. نیژدې دوه کاله مخکې د جگړې له پیل راهیسې، د دغې ساحلي تراډې څه ناڅه ټول دوه میلیونه اوسیدونکي په داخلي بیځایه سوو اوښتي دي. مرستندویه سازمانونو د سټلایت یا سپوږمکۍ د انځورونو پر اساس رپوټ ورکړی دی چې د غزې په تراډه کې څه د پاسه ۷۰ سلنه کورونه ویجاړ او یا هم سخت زیانمن سوي دي. په ځینو سیمو کې دغه کچه ۸۰ تر ۹۰ سلنې پورې رسیږي.