ترمپ امریکا ته د موټرو پر وارداتو ۲۵ سلنه تعرفه اعلان کړه
۱۴۰۴ فروردین ۷, پنجشنبه
د امریکا متحده ایالاتو ولسمشر، له بهر څخه پر وارداتي موټرو د ۲۵ سلنې گمرکي تعرفې له وضع مولو څخه خبر ورکړ چي د آلماني موټر جوړونکو له پاره به یوه سخته ضربه وي.
ترمپ د چهارشنبې په ورځ په سپینه ماڼۍ کي وویل چي دغه تعرفه به پر ټولو هغو موټرو چي په امریکا متحده ایالاتو کي نه تولیدیږي وضع سي او په پام کي ده چي د اپریل له دوهمې نېټې څخه به عملي سي. هغه زیاته کړه: «که هغوی په امریکا متحده ایالاتو کي تولید سي، بیا به نو هیڅ ډول تعرفه ونه لري.»
دونالډ ترمپ وویل چي د موټرو پر وارداتو باندي تعرفه «دایمي» ده. ولسمشر ترمپ ته نیژدې سرچینو ویلي دي چي دغه ۲۵ سلنه تعرفه به پر اوسنیو تعرفو سربیره وضع سي.
ترمپ په جنوري مياشت کي واک ته له رسیدو راهیسي، د تعرفو یوه لړۍ اعلان او یاهم عملي کړې ده. د متحده ایالاتو له خوا پر اوسپنو او المونیمو باندي نوې ۲۵ سلنه گمرکي تعرفه د مارچ مياشتي له ۱۲ مې څخه عملي سوې ده.
ترمپ همدارنگه د متحده ایالاتو پر سیال، چین هم ځیني تعرفې وضع کړي دي. چین داسي یو هیواد دی چی متحده ایالات ورسره تر ټولو ډیر تجارتي کسر لري.
د موټرو پر وارداتو دغه نوې تعرفه به ښايي د موټر جوړولو آلماني شرکتونه هم اغیزمن کړي. د امریکا متحده ایالاتو د ولسمشر کړنکلارې له تجارتي جگړې څخه بیره زیاته کړې ده چي سخت اقتصادي عواقب به له ځانه سره ولري.
د ترمپ د تعرفو سیاست چي له ډیرو لوړو ژورو سره مل دی، له اونیو راهیسي د اسهامو بازارونه له نوسان سره مخامخ کړي دي.
د امریکا متحده ایالاتو ولسمشر، دغه تعرفې د داخلي اقتصاد د پیاوړتیا له پاره یوه لار او پر نورو هیوادونو باندي فشار بولي. خو منتقدین خبرداری ورکوي چي د امریکا متحده ایالاتو د ولسمشر دغه اقدامات ښايي دغه هیواد له رکود سره مخامخ کړي او د مصرف کوونکو له پاره د بیو د لا ډېر لوړوالي سبب سي.