بلجیم غواړي د فلسطین دولت په رسمیت وپیژني
۱۴۰۴ شهریور ۱۱, سهشنبه
د بلجیم د بهرنیو چارو وزیر ماکسیم پریوو، ویلي دي چې دفلسطیني دولت د په رسمیت پیژندلو څخه یې د هیواد هدف، پر اسرائیل باندې د فشار راوستل دي، تر څو نړیوالو حقونو ته درناوی وکړي او هغه عملي کړي.
نوموړي بلجیمي چارواکي د دغې موضوع د اعلانولو ترڅنگ، پر خپله ایکس پاڼه لیکلي دي: «د یهودیت ضد هره پيښه او یا هم د حماس د پلویانو له خوا له ترهگرۍ څخه لمانځنه به هم په کلکه وغندل سي.»
د پریوو په خبره، د اردن سيند په اشغال سوي غاړه او غزه کې د اوسني وضعیت په پام کې نیولو سره، بلجیم "مجبور سو چې د اسرائیل پر حکومت او حماس ترهگرو باندې د فشار زیاتولو له پاره قاطع پریکړې وکړي."
اړوند:کوم هیوادونه د فلسطین دولت د په رسمیت پيژندنې غوښتونکي دي؟
په غزه کې " انساني تراژیدي"
د بلجیم د بهرنیو چارو وزیر د غزې وضعیت "یوه انساني تراژیدي" وبلله او ټینگار یې وکړ چې «د اسرائیل له خوا ترسره سوی زورزیاتی، له نړیوالو حقونو څخه سرغړونه ده.»
هغه وویل: «خبره د اسرائیل اولس ته پر سزا ورکولو نه ده، بلکي له دې خبرې ډاډ ترلاسه کول دي چې د هغوی حکومت نړیوالو حقونو او د بشر دوستۍ قوانینو ته درناوی وکړي او په سیمه کې د وضعیت د ښه والي له پاره اقدامات وکړي.»
نور کوم هیوادونه غواړي ورته اقدام وکړي؟
د نړۍ یو شمیر نورو هیوادونو لکه آسترالیا، کاناډا، پرتگال، فرانسې او مالتا هم مخکې ویلي ول چې په پام کې لري په نیویارک کي د روانې میاشتې په پای کي د ملگرو ملتونو په عمومي اسامبلۍ کې د فلسطین دولت په رسمیت وپیژني.
سربیره پردې، بریتانیې هم خبرداری ورکړی دی، که اسرائیل، ځانگړي شرایط پوره نه کړي، د فلسطین دولت به په رسمیت وپیژني.
اسرائیل په وار واره سره دغه اقدام غندلی دی او ویلي یې دي چې داسې یو کار ترهگرۍ ته د انعام ورکولو په معنی دی.