ایران د خلق مجاهدینو د ملاتړ له کبله ۶۱ امریکایان تحریم کړل
۱۴۰۱ تیر ۲۶, یکشنبه
د ایران د بهرنیو چارو وزارت له لوري د شنبې په ورځ (د جولای پر ۱۶مه) په خپره شوې اعلامیه کې راغلي چې په ایران کې د خلق مجاهدینو له سازمان څخه د «قصدي ملاتړ» په دلیل یې ۱۶ تنه امریکايي اتباع د ایران د بندیزونو لست ته ور زیات کړي دي. د تحریمونو په دغه لست کې د نورو سربیره د امریکا د پخواني ولسمشر دونالد ترمپ د واک په موده کې پخوانی د بهرنیو چارو وزیر مایک پمپیو، د پخواني ولسمشر دونالد ترمپ پخوانی وکیل رودي جولیاني او همدا راز د سپینې ماڼۍ پخواني د ملي امنیت سلاکار جان بولټن نومونه شامل دي.
د امریکا د بهرنیو چارو پخواني وزیر مایک پمپیو، د روان کال په لومړیو کې البانیا هیواد ته سفر وکړ او هلته یې د خلق د مجاهدینو له یوې سیمې لیدنه وکړه او په خپلو خبرو کې یې ویلي وو چې «د ایران رژیم په تیرو لسیزو کې د خپلې تر ټولو کمزورې نقطې ته رسیدلی دی.»
د امریکا د ملي امنیت پخوانی سلاکار جان بولټن او د نیویارک پخوانی ښاروال رودي جولیان هم د دغه سازمان کلک ملاتړي بلل کیږي کوم چې د ایران له لوري د تحریمونو لست هم ورزیات کړل شوي دي.
جان بولټن په ۲۰۱۷م کال کې د دغه سازمان د ملاتړو او غړو ته ژمنه ورکړې وه چې د دغه سازمان په ملتیا به د جمهوري اسلامي سقوط تر ۲۰۱۹م کال وړاندې په تهران کې په جشن ولمانځي؛ داسې ژمنه چې هیڅ پوره نه شوه.
د امریکا د بهرنیو چارو په وزارت کې د وسلو د کنترول د چارو مرستیالان سناتور جوزف لیبرمن او رابرت جوزف، د دموکراتانو د ګوند اړوند پخوانی سناتور رابرت توریسلي هم د هغو کسانو په ډله دي چې د ایران د تحریمونو تازه لست ته ورزیات کړل شوي.
دغو کسانو په زیاتره مواردو کې په وار وار او په ښکاره توګه د ایران پر ضد خپلې څرګندونې کړې وې او د ایران پر خلاف یې سخت موقفونه درلودل.
د ایران د بهرنیو چارو وزارت له ټولو اړوندو ادارو غوښتنه کړې چې د دغو تحریمونو د اغیزمنې عملي کیدو ته دې اقدامات وکړي. دغه تحریمونه د ایران حکومت ته اجازه ورکوي چې په ایران کې د یادو افرادو جایدادونه ضبط کړل شي. په داسې حال کې چې دا ډیر له احتماله لیرې بریښې چې په لست کې ذکر شوي کسان په ایران کې جایداد یا کاروبار ولري.
په ورته وخت کې دا لومړی ځل نه دی چې ایران په ورته اقدام لاس پورې کړی وي. ایران تر دې وړاندې هم یو شمیر امریکايي سازمانونه او افراد د خپلو تحریونو په لست کې اچولي وو. د بیلګې په توګه ایران په وروستیو میاشتو کې ۵۱ امیرکایان د قاسم سلیماني په وژنه کې د لاس لرلو له کبله تحریم کړي وو. تر دې وړاندې هم په سیمه کې په ترهګریزو فعالیتونو کې د ښکیلتیا له کبله ایران ۲۴ تنه نور هم تحریم کړي وو.
په ایران کې د خلق د مجاهدینو سازمان د ۱۳۹۱ کاله پورې د امریکا د بهرنیو چارو وزارت د ترهګریزو سازمانونو په لست کې وو او د هغه وخت د بهرنیو چارو وزارت په پریکړه له دغه لست څخه وایستل شو. د ایران او عراق د جګړې پرمهال، د صدام حسین په ملاتړ د دغه هیواد په اشرف اډه کې ځاي پر ځای شول او بیا د امریکا د پوځي حملې وروسته او د صدام حسن د حکومت تر سقوط وروسته، دغه کسان البانیا ته انتقال شول.
زموږ له آرشیف څخه: