ایران له اسرائیل سره تر جگړې وروسته، نوې دفاعي شورا جوړه کړه

د ایران د دولتي رسنیو د رپوټونو له مخې، د ایران د ملي امنیت عالي شورا د یکشنبه په ورځ ( ۲۰۲۵ م کال د اگست ۳مه) د ملي دفاع د یوې شورا جوړول تصویب کړل. دغه اقدام د جون په میاشت کي له اسرائیل سره له ۱۲ ورځنۍ جگړې وروسته ترسره سو چي په ۱۹۸۰ مه لسیزه کي له عراق سره د جگړې راهیسې،  د ایران  تر ټولو ستر پوځي چلنج بلل کیږي.

د ملي امنیت د عالي شورا د دارالانشاء په وینا «نوي دفاعي بڼسټ، دفاعي برنامې تر ارزونې لاندي نیسي او د ایران د وسله والو ځوکونو وړتیاوي به په مرکزي ډول لوړې کړي.»

دغه شورا به د  ایران  د ولسمشر، مسعود پزشکیان په مشرۍ فعالیت وکړي او پکښي  د دریو څانگو مشران، د وسله والو ځواکونو لوړ پوړي قوماندانان او اړونده وزارتونه شاملیږي.

همدارنگه د یکشنبه په ورځ، د ایران د وسله والو ځواکونو اعلی سرقوماندان، امیرحاتمي  خبرداری ورکړ چی د اسرائیلو  گواښونه همداسي ادامه لري او باید له پامه ونه غورځول سي.

د ایران د پارلمان اقتصادي کمیسیون د ملي اسعارو څخه د څلورو صفرونو د لیرې کولو زوړ پلان بیا راژوندی کړ.

د ایران د اسلامي پارلمان اقتصادي کمیسیون د یکشنبه په ورځ د ایران له ملي اسعارو څخه د څلورو صفرونو د لیرې کولو له پاره زړې برنامې بیرته راژوندۍ کړې؛ داسي یو اقدام چي د مالي معاملاتو د آسانۍ له پاره ترسره کیږي. د دغې طرحې پر بڼسټ، هر نوی ریال به د اوسني ریال ۱۰،۰۰۰ معادل وي.

دغه وړاندیز د لومړي ځل له پاره په ۲۰۱۹ م کال کی مطرح سو، خو له ځنډ سره مخامخ سو. اوس باید دغه لایحه،  د عملي کولو له پاره د پارلمان تصویب او وروسته د شورای نگهبان تأیید ته ورسیږي.

دغه گام په داسي حال کي اخیستل کیږي چي ایران   له مخ په زیاتیدونکو بحرانونو سره مخامخ دی چي پکښي د انفلاسیون زیاتیدل، د ملي اسعارو د ارزښت چټک کمښت او د نړیوالو بندیزونو اوږدمهاله اغیزې شاملې دي.

د داخلي رسنیو او د «بن ‌بست» د ویب پاڼي د رپوټونو له مخې، د یکشنبه تر ورځې پورې، په آزاد بازار کي د هر امریکايي ډالر ارزښت د شاوخوا ۹۲۰ زره ریالو رپوټ ورکړل سوی دی. د ایران اقتصاد له ۲۰۱۸ م کال راهیسي، یعني له اټومي تړون څخه د امریکا له وتلو وروسته، د سختو بندیزونو تر فشار لاندی سو.

ترمپ  ، د ۲۰۲۵ کال په جنوري کې واک ته له راستنېدو وروسته، د تهران په وړاندې د "اعظمي فشار" کمپاین بیا فعال کړ.