ایراني سپوږمکۍ تر پرواز اته دقیقې وروسته را نسکوره شوه
۱۳۹۸ بهمن ۲۱, دوشنبه
د ایران د انقلاب د بریالیتوب د کلیزې مراسمو په درشل کې دغه هیواد د «ظفر» په نوم یوه سپوږمکۍ فضا ته واستوله. ایراني دولتي راډیو تلویزون هم د یکشنبې په ورځ دغه اقدام په ژوندۍ بڼه خپور کړ، خو توغول شوې سپوږمکۍ ونه توانیدله چې ځان مدار ته ورسوي او په پای کې د هند په سمندر کې را ولویده.
د ایران د ارتباطي ټکنالوژۍ او تخنیک وزیر محمد جواد آذري جهرمي، هم د تویتر په یوه پوست کې د دغې سپوږمکۍ د توغول کیدو خبر ورکړ، خو وروسته یې د یوه بل تویت په خپرولو سره د دغې سپوږمکۍ پر ناکامۍ د اعتراف ترڅنګ په راتلونکې کې د یوې بلې سپوږمکۍ د توغولو خبر ورکړ.
د څلورم ځل له پاره بی نتیجې هڅه
د «ظفر» توغول د ځمکې مدار ته د ایران د سپوږمکیو د توغولو څلورمه ناکامه هڅه وه. دغه سپوږمکۍ د ایران د فضایې سازمان په سپارښتنه د دغه هیواد د علم او صنعت پوهنتون د کارپوهانو له خوا جوړه شوې ده.
د دې سپوږمکۍ د جوړیدو چارو څلور کاله دوام وکړ. مخکې تر دې هم ایران د «امید»،«پيغام» او «نوید» په نوم سپوږمکۍ توغولې وې.
د «ظفر» د ناکامۍ دلیل تخنیکي نیمګړتیا او د موتور یا انجن کمزوري ښودل شوې ده. دا په داسې حال کې ده چې د پیام سپوږمکۍ د ناکامۍ علت په الکترونیکي مدار کې مشکلات اعلان شوي وو.
دویچه ویله: ش.ن/ م.ج