کریکټ: ايټالیا د شل اوریز نړېوال جام سیالیو ته داخله شوه
۱۴۰۴ تیر ۲۱, شنبه
د ايټالیا د کریکټ کوچنی ټیم وتوانېد چې په تاریخ کې د لومړي ځل له پاره د کریکټ شل اوریز نړېوال جام سیالیو ته لار پیدا کړي. ايټالیا که څه هم د اروپا په مقدماتي سیالیو کې خپله وروستۍ لوبه نيدرلینډ ته بایلوده، خو دواړه ټیمونه په یادو سیالیو کې د ښو نمرو په درلودلو نړېوال جام ته کوالیفای شوي.
ايټالیا دغې تاریخي بریا ته د رسېدو له پاره یوازې د دې اړتیا درلوده چې له ېوې لوېې ماتې ځان وساتې چې کټ مټ همداسې ورسره وشول.
د جمعې ورځې په سيالۍ کې ايټالیا ټاس وګاټه او لومړی ېې توپوهنه وکړه چې په ۲۰ اورونو کې ېې د ۷ لوبغاړو په سوځېدو ۱۳۴ منډې جوړې کړې. نيدرلند په ۱۶،۲ اورونو کې د یوه لوبغاړي په سوځېدو ۱۳۵ منډې جوړې او لوبه ېې وګټله. خو دا چې په امتیازاتو کې ېې لږ توپیر و، دواړه ټيمونو د ۲۰۲۶م کال شل اوريز نړېوال جام ته ووتل.
د اروپا به مقدماتي سیالیو کې تر ټولو لويه ماتې سکاټلند وخوړه. د ياد هيواد لوبډلې د جمعې په ورځ له جرسي سره لوبه درلوده چې جرسي ورڅخه د سیالۍ په وروستي توپ لوبه وګټله. خو سکاټلند د بریا په صورت کې اړتیا لرله چې ايټالیا ته هم ماتې ورکړي.
د ۲۰۲۶ سیاليو کوربه توب به د هند او سریلانکا لخوا په مشترکه توګه کيږي، خو لا هم له افریقا، ختيځې آسیا او آسیا پاسیفیک سیمو څخه پنځه نور د غوراوي ځایونه پاتې دي.
د کریکټ شل اوره ۲۰۲۶م کال نړېوال جام سیالیو ته دغه هېوادونه کوالیفای شوي دي: کوربه هېوادونه هندوستان او سریلانکا، افغانستان، استرالیا، بنګله دیش، اینګلند، جنوبي افریقا، امریکا متحده ایالات، ویست انديز، ایرلند، نیوزیلند،پاکستان، کاناډا، نیدرلند او ايټالیا.