اوکراین: د بې پیلوټه الوتکي په بريد کي نهه کسان وژل سوي
۱۴۰۴ اردیبهشت ۳, چهارشنبه
د روسیې د بې پیلوټه الوتکي دغه برید د چهارشنبې په ورځ (۲۰۲۵ م کال د اپریل ۲۳) د اوکراین په دنیپرو پیتروفسک سیمه کي پر یوه بس باندي په داسي حال کي ترسره سوی دی چي پکښي د یوه شرکت کارکوونکي سپاره وه. د دغه برید په نتیجه کي د رسمي سرچینو د معلوماتو له مخي نهه کسان وژل سوي دي.
اړوند:پر اوکراین باندي تر مرگوني برید وروسته پراخ نړیوال انتقادونه
د سیمي ښاروال سیرهي لیساک، پر تیلگرام آنلایني سرویس لیکلي دي چي په مارهانیڅ ښار کي د دغه برید له امله د اوسنیو معلوماتو له مخي ۳۰ نور کسان زخمیان سوي هم دي. خو د زخمیانو شمیر «وار په وار د زیاتیدو په حال کي دی.»
د چهارشنبې په شپه د روسیې له خوا بریدونو په نتیجه کي داوکراین په بیلابیلو سیمو کي له اورلګیدونو خبر ورکړل سوی دی. د رسمي معلوماتو له مخي د کیف ، خارکوف، پولتاوا، اودیسه او دنیپرو پیتروفسک سیمي اغېزمني سوي دي. د رپوټونو په حواله د روسيه په سرحدي سيمه بیلگرود کي یو کس د ډزو په نتیجه کي ټپي سوی دی.
د چهارشنبې په ورځ په لندن کې د اوکراین ، امریکا، بریتانیا او فرانسې ترمنځ خبري اتري پلان سوې دي. په دې بڼه کي یوه غونډه تېره اونۍ په پاریس کې جوړه سوې وه.
اړوند:ترمپ: روسيه دې په اوکراین کې د «بې معنی» جګړې د پای له پاره هڅې وکړي
ترمپ له څو میاشتو راهیسې په اوکراین کي د جګړې پر ژرترژره پای ته رسولو باندي ټینګار او د چټک اوربند غوښتنه کوي - خو د روسیې ولسمشر دا خبره ردوي.
ترمپ د جمعې په ورځ ګواښ وکړ، چې که کیف یا مسکو خبري اتري "ډېرې ستونزمنې" کړي، نو امریکا به د اوکراین له خبرو اترو څخه ووځي.