افغانستان کې پر تریاکو بندېز او نړۍ کې د کوکائین زیاتېدل
۱۴۰۴ اردیبهشت ۲, سهشنبه
په افغانستان کې د طالبانو ادارې له لوري د کوکنارو پر کرکیلې بندیز په نړۍ کې د نشهيي توکیو د بازار بڼه بدله کړې. د جرمني پولیسو خبرداری ورکړی دی، چې د دې بدلون له کبله په اروپا او ځانګړې توګه په آلمان کې کوکاین زيات شوي دي.
د جرمني د جنايي فدرالي ادارې مشر هولګر مونش د RND په نوم رسنۍ سره په خبرو کې ویلي دي، چې حداکثر کچې ته د شمالي امریکا د بازار رسېدلو له امله اروپا د کوکاینو د ویش په مخ پر ودې مرکز بدلېدونکې ده.
نوموړي دا حالت د «کوکاینو له سیلاب» سره پرتله کړی او خبرداری یې ورکړی دی، چې نشهيي توکي په ټول هېواد کې د خپرېدو په حال کې دي.
د آلمان د فدرالي جنايي ادارې دا چارواکي د پوډرو په بازار کې له بدلون هم خبرداری ورکوي او دغه راز یې په افغانستان کې د طالبانو له لوري د کوکنارو د کرکیلې بندولو ته هم اشاره کړې ده.
د هغه په وینا، د هیروینو د عرضې کمښت کولی شي چې له مصنوعي افیونو سره د مخلوط کېدو لامل شي او دا چاره مصرفوونکیو ته لا ډېر ګواښ پېښولی شي.
د جرمني د جنايي ادارې د شمېرو له مخې، په ۲۰۲۴م کال کې په هیروینو پورې اړوند جرمونه کم شوي دي. په همدې حال کې په کوکائینو پورې اړوند جرمونه پنځه سلنه زیات شوي او د LSD یا لایزرژیک اسید دی اتیل امید ۳۲،۶ سلنه ګواښوونکی زیاتوالی ښيي او تر څنګ یې نوي پیدا شوي مصنوعي نشهيي توکي ۴۱،۶ سلنه ثبت شوي دي.